Татарстан Президенты Рөстәм Миңнехановка Казансуның уң як ярын уңайлыклар белән тәэмин итү концепциясе тәкъдим ителде

Казансуның уң як ярын уңайлыклар белән тәэмин итү концепциясен бүген Татарстан Республикасы Президенты Рөстәм Миңнехановка тәкъдим иттеләр.

Тәкъдир итү вакыйгасы Казан Ратушасында узды. Чарада Казан мэры Илсур Метшин, ТР төзелеш, архитектура һәм торак-коммуналь хуҗалык министры вазифаларын башкаручы Марат Хөснуллин, ТР экология һәм табигый ресурслар министры вазифаларын башкаручы Әгъләм Садретдинов, ТР төзелеш, архитектура һәм торак-коммуналь хуҗалык министры урынбасары вазифаларын башкаручы - "Татинвестгражданпроект" дәүләт унитар предприятиесе генераль директоры Ирек Фәйзуллин, Казанның баш архитекторы Татьяна Прокофьева һ.б. катнашты.

Проектны "Одис" сәүдә-сәнәгать төркеменең (Йошкар-Ола) генераль директоры Александр Одинцов тәкъдим итте.

Проект үз эченә Казансуның уң як ярын (Пролетар урамы буенча), Кремль һәм Киров күперләре арасын уңайлыклар белән тәэмин итү комплексын ала. Татарстан башкаласы халкы һәм аның кунаклары тарафыннан ел әйләнәсендә ял итү урыны буларак файдаланыла торган зонаны булдыру каралган.

Пляж зонасы өчен ком китертү, суга төшү юлларын оештыру, кибетләр, клублар, инвентарьны арендага алу пунктлары, кечкенә кунакханәләр төзелеше планлаштырыла.

Моннан кала, җәяүлеләр һәм велосипед юлларын, футбол аланнарын кору каралган. Казансуның үзендә исә декоратив фонтаннар эшләячәк. Шул рәвешле бу  җирдә елга сазлыкка әйләнеп барудан туктаячак, дип көтелә.

Уңайлыклар белән тәэмин итү линиясенең озынлыгы - 1400 метр, проектның гомуми мәйданы - 14 га.

Проект шәхси инвесторлар акчаларына тормышка ашыралачак дип көтелә.

Татарстан Президенты Рөстәм Миңнеханов проектны, тулаем алганда, хуплады. "Идеясе дөрес, - диде ул. - Бүген бу шәһәр өчен актуаль".

Рөстәм Миңнеханов сүзләренчә, шәһәрдәге ял итү зоналары шәһәр халкы өчен бик кирәк. Ул әлеге ял зонасына автомобильләр кертүне чикләргә тәкъдим итте. Шул рәвешле шәһәр халкы җәяүлеләр һәм велосипед юлларыннан активрак файдаланачак.