Татарстан Президенты Рөстәм Миңнеханов: Бөек Ватан сугышы ветераннарын торак белән тәэмин итү эше оешкан төстә бара

Яшәү шартларын яхшыртуга мохтаҗ булганнар исемлегенә 2005 елның 1нче мартына кадәр баскан Бөек Ватан сугышы ветераннарын торак белән тәэмин итү эше Татарстан Республикасында оешкан төстә бара. 2010 елның 1нче апреленә булган мәгълүматлар буенча 19 ветеранга торак бирелмичә калган иде, 6нчы апрельдә торак алмыйча калган ветеран 5әү булган булса, хәзер инде бу мәсьәләләр тулысынча хәл ителгән.

Ул хакта бүген Татарстан Республикасы Президенты Рөстәм Миңнеханов Россия Федерациясе төбәкләр үсеше министры Виктор Басаргинга видеоконференция тәртибендә узган киңәшмәдә җиткерде.

Киңәшмәдә федерациянең барлык субъектлары да катнашты. Көн кадагында торган төп мәсьәлә - яшәү шартларын яхшыртуга мохтаҗ булганнар исемлегенә 2005 елның 1нче мартына кадәр  һәм 2005 елның 1нче мартыннан соң баскан Бөек Ватан сугышы ветераннарын торак белән тәэмин итү.

Киңәшмәне башлаганда, Виктор Басаргин, әлеге мәсьәләне хәл итү өчен, кирәкле чараларның федерация субъектларына инде җибәрелгәнен хәбәр итте. Бүген Россия буенча яшәү шартларын яхшыртуга мохтаҗ булганнар исемлегенә 2005 елның 1нче мартына кадәр баскан 1290 ветеран торак белән һаман да тәэмин ителмәгән.

Россиянең төбәкләр үсеше министры яшәү шартларын яхшыртуга мохтаҗ булганнар исемлегенә 2005 елның 1нче мартыннан соң баскан ветераннарны торак белән тәэмин итү өчен төбәкләргә 4,5 млрд. сумлык транш юлланганын җиткерде. Виктор Басаргин сүзләренчә, 2005 елның 1нче мартыннан соң чиратка баскан 1546 ветеран инде яңа торакка күчкән. 2005 елның 1нче мартыннан соң чиратка басучылар саны 67 меңнән артык кеше тәшкил итә.

Россиянең төбәкләр үсеше министры федерация субъектлары җитәкчеләрен "ветераннарны торак белән тәэмин итү эшендә тизлекләрне киметмәскә" сорады. Ул шулай ук, төбәкләрнең 90%ы торакка мохтаҗ булган ветераннар саны турындагы мәгълүматларны инде хәбәр иткәннәрен җиткерде.

Ветераннарга торак бирү эше 2010 елда төгәлләнергә тиеш, дип белдерде Виктор Басаргин. Аның сүзләренчә, 2011 елда 2010 ел азагында чиратка баскан ветераннар гына күченерлек булсын.

Видеокиңәшмәдә үзләрендәге вәзгыять белән Калмыкия, Төньяк Осетия, Тыва, Татарстан һ.б. төбәкләр таныштырды.

Татарстан Президенты Рөстәм Миңнеханов республикада 2005 елның 1нче мартыннан соң чиратка баскан ветераннарны торак белән тәэмин итү чорының башлануын хәбәр итте. Андыйлар Татарстанда - 7 меңнән артык кеше (7191 кеше). Алар өчен 250 мең кв. метр торак кирәк.

Республикада вәзгыять анализланган, кайсы ветеранга нинди торак кирәклеге ачыкланган.

Тулаем алганда, әлеге юнәлеш буенча республикада эш оешкан төстә бара. Ел азагына бу мәсьәләне хәл итүебездә шигем юк, дип ышанам, дип белдерде Рөстәм Миңнеханов.