Татарстан Президенты Рөстәм Миңнеханов: Татарстан һәм Нигерия нефть табу, нефтехимия, машиналар төзү, мәгариф өлкәсендә хезмәттәшлек итә ала

Бүген Татарстан Республикасы Президенты Рөстәм Миңнеханов Казан Кремлендә Нигерия Федератив Республикасының Россия Федерациясендәге Гадәттән тыш һәм Тулы вәкаләтле вәкиле Тимоти Май Шелпиди белән очрашты.

Сүз Нигериянең Татарстан Республикасы белән хезмәттәшлек итә алуы турында барды.

Рөстәм Миңнеханов Нигерия делегациясен сәламләп Нигериянең Россиянең үзе белән генә түгел, Россия Федерациясе төбәкләре белән дә мөнәсәбәтләрне ныгыту өстендә эш алып баруы өчен рәхмәтен җиткерде.

"Кызганыч, мөнәсәбәтләребез шактый түбән дәрәҗәдә", - диде Татарстан Президенты. Аның фикеренчә, Татарстан һәм Нигериянең уртак яклары күп. Без нефть табу, нефтехимия, машиналар төзү, мәгариф, мәдәният өлкәсендә хезмәттәшлек итә алабыз.

Рөстәм Миңнеханов Нигериянең нефть таба торган ил булганын билгеләп үтте. Бу өлкәдә Татарстан белән хезмәттәшлек итүе һәр ике як өчен дә файдалы булырга мөмкин.

Шулай ук, Татарстан Президенты Татарстан югары уку йортларында белем алучы Нигерия студентлары санының арттырырга мөмкин булганын ассызыклады (бүген Казанда Нигериядән 11 студент белем ала).

Үз чиратында, Нигерия Федератив Республикасының Россия Федерациясендәге Гадәттән тыш һәм Тулы вәкаләтле вәкиле Тимоти Май Шелпиди Нигерия делегациясен кунакчыл итеп каршы алуларына рәхмәтен җиткерде һәм Рөстәм Миңнехановны Татарстан Президенты вазифасына керешүе белән тәбрикләде.

Безнең делегация бирегә Россия төбәкләре белән хезмәттәшлек итүнең яңа мөмкинлекләрен ачу өчен килде, диде Нигерия вәкиле. Ул Рөстәм Миңнехановны бәйсез Нигериянең тарихы белән таныштырды.

Исегезгә төшерәбез: Нигерия-Россия мөнәсәбәтләре 1960 елда урнаштырылган. 1963 елда Нигерия Федератив Республикасының Мәскәүдә вәкиллеге ачыла.

Россия Нигериягә хәрби арсеналны булдыруда, хәрби белгечләрне әзерләүдә, аларны Россия территориясендә укытуда һәрдаим ярдәм итә килде.

Нигериянең Россиядәге вәкиле Тимоти Май Шелпиди фикеренчә, Татарстан белән хезмәттәшлек итү бигрәк тә нефть һәм газ табу, нефтехимия, машиналар төзү, очкычлар һәм вертолетлар төзелеше кебек өлкәләрдә уңышлы булырга мөмкин. Аның сүзләренчә, Нигерия белгечләре Татарстан Республикасының тәҗрибәсен өйрәнә ала.

Тимоти Май Шелпиди, шулай ук, төрле дин вәкилләренең Татарстанда дустанә мөнәсәбәттә яшәүләрен билгеләп үтте. Нигерия - күпмилләтле һәм күпдинле дәүләт, шуңа күрә Татарстан тәҗрибәсе бик актуаль.

Моннан кала, Татарстан мәдәнияте, аның традицияләре дә бик кызыклы, дип хәбәр итте ул.

Татарстан Президенты Рөстәм Миңнеханов ТР сәнәгать һәм сәүдә министры вазифаларын башкаручы Равил Зариповка Нигерия делегациясенең Татарстанга визиты нәтиҗәләре буенча эшлекле төркем оештырырга дигән бирем бирде. Алга таба уртак проектларны ачыклау максаты белән Татарстан белгечләрен Нигериягә җибәрү каралган.

Бүген безгә чын элемтәләр урнаштыру зарур, диде Рөстәм Миңнеханов, без үзебезнең яктан һәр ике як өчен дә файдалы булырдай хезмәттәшлеккә әзер.