Татарстан Президенты Рөстәм Миңнеханов: Бүген без барыбыз да 2013 ел Универсиадасына әзерлек белән яшибез

Бүген Татарстан Республикасы Президенты Рөстәм Миңнеханов Казан Кремлендә Халыкара студент спорты федерациясе делегациясе  (Federation International Sports University – FISU) белән очрашты.

Исегезгә төшерәбез: FISU делегациясе Татарстан башкаласына 12нче апрельдә инспекция визиты белән килде. Делегация составында - FISU башкарма комитеты әгъзасы, техник комиссия рәисе Ставрос Дувис (Греция), FISUның җәйге Универсиадалар директоры Марк Вандеплас (Бельгия), FISUның спорт программалары менеджеры Михал Бушель (Словакия), FISUның ММЧ һәм коммуникацияләр буенча директоры Деян Сусович (Сербия), FISUның башкарма комитеты әгъзасы, Россия спорт студент союзы президенты Олег Матыцин (Россия).

Казан Кремлендәге очрашуда Татарстан Президенты FISU делегациясен кайнар сәламләде.

Бүген без барыбыз да 2013 ел Универсиадасына әзерлек белән яшибез, диде Рөстәм Миңнеханов. Аның сүзләренчә, делегациягә Универсиада объектларында башкарылган барлык эшләр дә күрсәтеләчәк. Эшләр футбол стадионыннан кала барлык объектларда да бара. Стадионның төзелешен быел башлау планлаштырыла.

"Универсиада турында хыялабызның чынга ашачыганда шикләребез юк", - диде Рөстәм Миңнеханов. Объектларда югары профессиональ белгечләр эшли, алдагы Универсиадалар тәҗрибәсе исәпкә алына. Соңгы вакытта Казанда 11 спорт объекты файдалануга тапшырылган. 2010 елда тагын 16 корылма сафка басачак. Май азагына сигез объект инде әзер булачак, диде Татарстан Президенты.

Ул шулай ук федераль үзәкнең Универсиада проектына һәрьяклап ярдәм күрсәткәнен билгеләп үтте. Россия Хөкүмәте һәм РФ спорт министрлыгы, Россия спорт студент союзы да һәрьяклап ярдәм күрсәтә.

Сентябрьгә без Универсиада Авылының беренче комплексын ачарга ниятлибез, диде Рөстәм Миңнеханов. Бу бик җитди объект. Аны тормышка ашыруда Белград коллегаларының ярдәме гаҗәеп зур булды.

Татарстан башлыгы сүзләренчә, Авылның беренче комплексы Казан (Идел буе) федераль университетының ихтыяҗларын канәгатьләндерәчәк.

Авылның икенче комплексы яңа уку йорты - Физкультура академиясе өчен төзеләчәк. Әлеге югары уку йорты Казанда Яр Чаллыдан күчерелгән Кама дәүләт физик культура, спорт һәм туристлык академиясе нигезендә оештырылачак.

Тулаем алганда, спорт объектларын төзүдә һәм аларны файдалануга тапшыруда сорауларыбыз юк, диде Рөстәм Миңнеханов. 2013 ел җәйге студент уеннарына транспорт инфраструктурасын әзерләү буенча да бик җитди эш башкарыласы. Республикада әлеге эш инде башланган: юл чишелешләре төзелә, "Казан" халыкара һава аланы төзекләндерелә. Әлеге эшләр күбрәк чыгымнар таләп итә, диде ул. 2010 елда әлеге максатларга 10 млрд. сум бүленеп бирелгән.

Татарстан Президенты FISU делегациясен киләчәк Уеннарның куркынычсызлыгы белән таныштырды. Федераль структуралар Казандагы Универсиадада һәм Сочидагы Олимпиадада куркынычсызлык чараларын тәэмин итү буенча комплекслы эш алып бара.

Федераль үзәк ярышларны ТВ эфирында күрсәтү өлкәсендә дә ярдәм итә. "Спортивное вещание" оешмасы белән эш дәвам итә. "Тулаем алганда, бар да әйбәт. Куелган максатлардан кире тайпылмабыз, дип уйлыйм. Без Казанга, безнең республика һәм безнең илгә күрсәтелгән ышанычны аклаячакбыз", - диде Рөстәм Миңнеханов.

FISUның техник комиссия рәисе Ставрос Дувис, үз чиратында, Рөстәм Миңнехановны Татарстан Республикасы Президенты вазифаларына керешүе белән тәбрикләде. Ул техник комиссия әгъзалары Казандагы Универсиадага һәрьяклап ярдәм итәчәген билгеләп үтте.

FISUның башкарма комитеты әгъзасы, Россия спорт студент союзы президенты Олег Матыцин 2013 ел Универсиадасына әзерлек тизлекләре хәтта FISU киңәш иткән тизлекләрдән дә артуын билгеләп үтте. "Казандагы әзерлек бик уңышлы бара", - диде ул.

Очрашудан соң Ставрос Дувис, Казан мэры Илсур Метшин, FISU делегациясенең башка әгъзалары ММЧ вәкилләре сорауларына җавап бирде.