Татарстан Президенты Рөстәм Миңнеханов: авыл территорияләрен комплекслы рәвештә үстерү буенча Ульяновск өлкәсе тәҗрибәсен өйрәнергә кирәк

Авыл территорияләрен комплекслы рәвештә үстерү проектын бүген Татарстан Республикасы Президенты Рөстәм Миңнехановка тәкъдим иттеләр.

Тәкъдир итү чарасын "Александровка" компаниясе уздырды. Компания вәкилләре Ульяновск өлкәсендә авыл территориясен комплекслы рәвештә үстерү турында сөйләде.

Ульяновск өлкәсе "Яңа Малыклы районы" муниципаль берәмлегенең Александровка бистәсендә "Яңа авыл" проекты оештырылган. Әлеге проект кысаларында җыелма йортлар һәм металл-каркас мини-фермалар төзелеше башкарыла.

Проект буенча әлеге төр авыл хуҗалыгы предприятиесендә җитештерү линиясе кимиячәк, шул рәвешле мини-ферманы бер генә фермер яисә бер генә гаилә карый алачак.

Проектта төрле юнәлештәге торак йортлар һәм фермалар төзү каралган.

Барлыгы 91 объект планлаштырылган. Шуларның 45е - дуңгыз фермалары, 20се - сөт фермалары, 26сы - кош фермалары. Барлык фермаларның гомуми җитештерү күләме 1449 тонна тәшкил итә.

Барлыгы 137 ферма төзеләчәк - кәҗә, сарык фермалары, балык фермалары, үсемлекләр фермалары һ.б.

Әлеге проектка кертелгән ивестицияләр күләме 1,5 млрд. сум тәшкил итә. Александровка бистәсе 1 млрд. сумлык авыл хуҗалыгы продукциясен җитештерә алачак.

Хәзерге вакытта беренче чиратның төзелеше төгәлләнгән - 24 йорт һәм гаилә тибындагы 24 ферма инде әзер.

Әлеге фермаларда авыл хуҗалыгы өлкәсе буенча тиешле белемнәре булган 30 яшькәчә кешеләр яшәр дип фаразлана.

Проектның җитәкчесе Юрий Шевченко хәбәр итүенчә, ферма тирәсендәге кайбер йортларны тулай торак формасында төзү каралган. Биредә 6 айлык тәҗрибәгә килүчеләр урнаштырылачак.

Алга таба исә фермада калырга дәгъва кылучылар конкурс нигезендә сайлап алыначак. Алар белән 10 еллык килешү төзеләчәк. Айлык хезмәт хакы исә 25-30 мең сум тәшкил итәчәк. 10 елдан соң торак йорт һәм ферма кооперативның әлеге әгъзасына милек булып күчә.

Татарстан Президенты Рөстәм Миңнеханов әлеге проектны республика территориясендә җәелдерү мөмкинлеген өйрәнү кирәклеген белдерде. Проектның җитәкчесе Юрий Шевченкога мөрәҗәгать итеп, Рөстәм Миңнеханов әлеге формадагы технологияләргә безнең белгечләрне өйрәтергә мөмкин икәнлеген җиткерде.

Шулай ук, Рөстәм Миңнехановны фермадагы торак йортның бәясе, әзер продуктның күпме торганы, логистика, ферманы ашлык белән тәэмин итү кебек мәсьәләләр кызыксындырды.

Татарстан башлыгы авыл территорияләрен комплекслы рәвештә үстерү буенча Ульяновск өлкәсе тәҗрибәсен өйрәнергә кирәклеген әйтте.

Проектны тәкъдир итү вакыйгасында ТР Премьер-министры урынбасары вазифаларын башкаручы - ТР авыл хуҗалыгы һәм азык-төлек министры вазифаларын башкаручы Марат Әхмәтов, ТР Министрлар Кабинетының агросәнәгать комплексы, җир мөнәсәбәтләре һәм кулланучылар базары идарәсе башлыгы Анатолий Краснов, "Алтын башак", "Кызыл Шәрык Агро" агрохолдинг компанияләре вәкилләре һ.б. катнашты.