Татарстан Республикасы Премьер-министры Илдар Халиков "Созвездие-Йолдызлык" фестивале җиңүчеләрен тәбрикләде

Бүген “Пирамида” мәдәни-күңел ачу комплексында «Созвездие-Йолдызлык-2010» дигән X ачык республика телевизион яшьләр эстрада сәнгате фестиваленең гала-концерты узды. Чара Бөек Ватан сугышында җиңүебезгә 65 ел тулуга багышланды. Анда олы кунак булып ТР Премьер-министры Илдар Халиков, ТР Премьер-министры урынбасары – мәдәният министры Зилә Вәлиева, РФ Дәүләт Думасы вәкилләре катнаштылар.

Гала-концертта Казан һәм республикабызның башка шәһәр-районнарыннан 30га якын эстрада-вокал һәм хореография коллективы, аерым башкаручылар – барлыгы 400гә якын яшь талантлар чыгыш ясады. “Сугыш хатлары” композициясен тәкъдим иткән, Әлмәттәге “Настроение” үрнәк хореография ансамбле, “Ана җыры”н башкарган, Теләчедән Инсаф Бәдретдинов, Илназ Хәнәфиев, Илнат Фәрхуллин, “Фронтовая” хореографик композициясен күрсәткән, Казаннан “Дорога из города” бию театры студиясенең “Остров сокровищ” төркеме һәм башка коллективларның чыгышлары халыкта аеруча матур хисләр уятты. Концертны ТР атказанган артисты Дмитрий Платонов һәм Марина Михайлова алып барды.

Гала-концертта җиңүчеләр “Вокал-соло”, “Вокаль ансамбльләре”, “Хореография”, “Конферанс”, “Җырга иң яхшы көй”, “Иң яхшы җыр сүзләре” һәм “Видеоклип” номинацияләрендә билгеләнде. Фестивальдә катнашучыларны РФ һәм ТР халык артисткасы, Зилә Сөнгатуллина җитәкчелегендәге жюри бәяләде. Фестиваль лауреатларын котлаучылар арасында Россия Дәүләт Думасы депутаты, авыл хуҗалыгы сәясәте Комитеты рәисе урынбасары Айрат Хәйруллин, РФ Дәүләт Думасының иҗтимагый һәм дини оешмалар эшләре буенча Комитеты рәисе урынбасары Алла Кузьмина да бар иде.

Айрат Хәйруллин әйтеп үткәнчә, андый фествиаль Россиядә үткәрелми. Чара яшьләргә үз сәләтен күрсәтергә мөмкинлек бирә, аларда Ватанга мәхәббәт хисен тәрбияли. Алла Кузьмина фикеренчә, фестиваль – Рсосиядә иң яхшы милли проект булып саналырга мөмкин. Олы кунаклар "Конферанс" номинациясендә җиңү яулаган, Теләче авылыннан 5 яшьлек Булат Котдусовка һәм Мөслим авылыннан 5 яшьлек Азат Латыйповка бүләкләрен тапшырды.

Зилә Вәлиева РФ мәдәният министры А.Авдеевның котлау юлламасын ирештерде һәм аны фестивальнең продюсеры Дмитрий Тумановка тапшырды. Үз котлау сүзләрен шулай ук ТР яшьләр эшләре, спорт һәм туризм министры урынбасары Юсуп Якупов һәм “Татарстан – яңа гасыр” телерадиокомпаниясе генераль директоры Илшат Әминов әйттеләр.

Фестивальгә килгән ветераннар исеменнән чыгыш ясаган, Вахитов районы ветераннары Советы рәисе Генрих Бердников сүзләренә караганда, сугышта катнашучылар батырлык кылганда, беренче чиратта, үз иле, үз Ватаны һәм җиңүне якынайту турында уйлаган. “Һәрберебез ул вакытта Ватан, ил язмышы өчен җаваплы булуыбызны тойдык. Монда бүген сугышта һәм тылда зур фидакарьлек күрсәткән ветераннар утыра. Алар ул вакытта зур батырлык күрсәтеп калмыйча, бүген дә ветераннар советында актив әгъза булып торалар, яшьләрдә ватанпәрвәрлек хисләрен тәрбияләүдә катнашалар. Менә шундый алар – безнең ветераннар”, - диде ул.

Фестиваль Гран-приларын җиңүчеләргә республика Премьер-министры Илдар Халиков тапшырды. “"Созвездие–Йолдызлык» республика фестивале - бүгенге эстрада сәнгате өлкәсендә республика өчен зур әһәмияткә ия булган зур чара. Ул сәләтле яшьләрне ачыклау һәм аларга булышлык күрсәтү максатын күздә тота. Бүгенге гала-концерт Татарстан балаларына, ә хәзер инде Россия төбәкләрендә яшәүче балаларга да булышлык итәргә теләүче кешеләрнең бөек эш кылуын дәлилли. Ветераннар бүгенге һәм киләчәк буын белән чын рәвештә горурлана ала. Әлеге фестивальне оештырырга ярдәм иткән – Татарстанның беренче Президенты Минтимер Шәймиевкә, Татарстанның бүгенге Президенты Рөстәм Миңнехановка рәхмәт сүзләрен ирештерәсе килә. Сәләтле балаларның әти-әниләреннән, мөгаллимнәреннән башка да шундый фестиваль узмас иде”, - диде Премьер-министр.

“Созвездие-Йолдызлык-2010” фестиваленең вокал буенча Гран-приена Америка кино йолдызы Дженифер Лопес репертуарыннан “Номэамес” җырын башкаручы Лев Матвеев һәм Олеся Полищук лаек булды. Аларга кубок, диплом, йолдыз сертификаты һәм башка бүләкләр тапшырылды. Хореография буенча Гран-прига ия булган Менделеевскиның “Кристалл” эстрада биюе коллективына кубок, диплом, алтын кулон, дәүләт стипендиясе бирелде.

Иң яхшы балетмейстерлык эше өчен дипломны Казаннан Лилия һәм Айрат Бәһаветдиновлар алды. Иң яхшы мөгаллимнәргә “ТР атказанган мәдәният эшлелкесе” исемнәре бирелде. Гала-концерт фестивальдә катнашучыларның “Кояш дискотекасы” чыгышы белән тәмамланды.