Владимир Путин: “Казан Универсиадасы Сочи Олимпиадасының кереш өлеше булырга тиеш”

“Казан Универсиадасы 2014 елда Сочида узачак кышкы олимпия уеннарының кереш өлеше булырга тиеш”. Бүген Казан Кремлендә 2013 елгы Универсиадага әзерлек мәсьәләләренә багышланган киңәшмәдә РФ Премьер-министры Владимир Путин әнә шулай дип белдерде. РФ Хөкүмәте җитәкчесе рәислегендә узган киңәшмәдә РФ беренче вице-премьеры Игорь Шувалов, ТР Президенты Рөстәм Миңнеханов, федераль министрлыклар һәм ведомстволар, “Россия тимер юллары” ААҖ җитәкчелеге, ТР министрлыклары һәм ведомстволары җитәкчеләре, Казан мэры Илсур Метшин һ.б. катнашты.

Казанның 27 нче җәйге Бөтендөнья студентлар спорты ярышларын кабул итү хокукын алуына 2 ел вакыт узды. Бүгенге киңәшмәдә Владимир Путин Татарстан башкаласының гадел көрәштә җиңеп чыгуын тагын бер кат искәртте. Аның ассызыклавынча, 2013 елда узачак Универсиада 2014 елгы Сочи Олимпиадасына әзерлекнең мөһим бер этабы булачак. Универсиада кышкы олимпия уеннары өчен дә технологик полигон ролен уйнарга, биредә эшләрне координацияләү буенча җайга салынган система кышкы олимпия уеннары өчен дә өлге булырга тиеш. Аның белдерүенчә, Казан Универсиадасына әзерлек өчен республика казнасыннан 5 млрд. сум, федераль казнадан 26 млрд. сум финанслар бүленгән. “Без бу халыкара масштаблы ярышларны югары дәрәҗәдә уздырырга тиеш”, -ди ил Хөкүмәте рәисе.

Билгеле булганча 2013 елгы Казан Универсиадасына 64 спорт корылмасы әзерләнә. ФИСУ таләпләре буенча, аларның барысы да уеннар башланганчы 1 ел алдан әзер булырга тиеш. 2012 елның июленә Казанда Универсиада программасына кертелгән барлык 26 спорт төре буенча тест ярышлары узачак.

“Универсиада ныклы финанс нигезе белән тәэмин ителгән. 2009-2010 елларда федераль казнадан бу максатларга 21 млрд. сум бүлеп бирелде. 2011 елда тагын 5,5 млрд. сум бүленәчәк”, -ди Путин. Ул үз чыгышында Универсиада инфраструктурасы төзелешенә шәхси инвестицияләр җәлеп ителүгә дә басым ясады. Мәсәлән, “Россия тимер юллары” ААҖ “Казан” халыкара аэропортын тимер юл вокзалы белән тоташтырачак тимер юл проектына 4-6 млрд. сум тирәсе инвестицияләргә җыена. “Мегафон” җәмгыяте -2 млрд. сум финанслар салырга ниятли.

РФ Премьер-министры белдерүенчә, спорт корылмалары төзелешеннән тыш, Универсиаданың лаеклы узуы өчен транспорт инфраструктурасының тиешле югарылыкта булуы да мөһим.