Татарстан Президенты Рөстәм Миңнеханов Беларусь Республикасының рәсми делегация әгъзаларына Универсиада-2013 Авылының төзелеш мәйданчыгын күрсәтте

Бүген Беларусь Республикасының рәсми делегация әгъзалары Казандагы Универсиада-2013 Авылының төзелеш мәйданчыгын карады.

Исегезгә төшерәбез: Беларусь Республикасы Премьер-министры Сергей Сидорский җитәкчелегендәге рәсми делегация Казанга ике көнле рәсми визит белән килде.

Татарстан Президенты Рөстәм Миңнеханов төзелеш проекты турында сөйләде, Универсиада-2013 мирасының алга таба кулланылышы белән таныштырды. Кунаклар Универсиада Авылының корпусларының берсендә бүлмәләрне дә карады. Аларны ТР Президенты Рөстәм Миңнеханов һәм Казан мэры Илсур Метшин озатып йөрде.

ТР Президенты Рөстәм Миңнеханов Универсиада объектларының төзелеше яхшы тизлек белән барганын билгеләп үтте.

Соңрак кунакларга Казан теннис академиясе бинасын күрсәттеләр. Беларусь делегациясе әгъзалары күнегүләр залларын, тренажер залын, ябык теннис кортын карады.

Казан теннис академиясендә тәүге ярышлар 2010 елның февралендә узды (ATPның "Challenger" квалификациясендәге "Казан Кремле Кубогы" халыкара турниры, төп челтәргә Россия, Тайланд, Испания, Польша, Украина һәм Беларусьтән 22 спортчы узган иде).

Алга таба Беларусь Республикасы делегациясе IT-паркка юл тотты (Петербург ур.). IT-парк эшчәнлеге белән ТР вице-премьеры - ТР мәгълүматлаштыру һәм элемтә министры Николай Никифоров таныштырды.

Ул Татарстан Республикасында IT-өлкәдә тормышка ашырылган проектлар турында сөйләде. Алар арасында - документ әйләнешенең ведомствоара электрон системасы, халыкка дәүләт һәм муниципаль хезмәтләрне электрон рәвештә тәкъдим итү, ТР Электрон сәүдә-мәгълүмат системасы һ.б.

ТР мәгълүматлаштыру һәм элемтә министры, шулай ук, ТР Хөкүмәте рәсми порталы эше белән дә таныштырды (www.prav.tatar.ru).

Көннең икенче яртысында Беларусь Республикасының рәсми делегациясе Дан мемориалы колоннадасының Мәңгелек утына чәчәкләр салыр, Татарстан Президенты Рөстәм Миңнеханов белән Казан Кремлендә очрашыр дип көтелә.

15нче майга "КамАЗ" ААҖ, "Мастер" индустриаль паркы, "Алабуга" махсус икътисадый зонасына бару каралган.