Рөстәм Миңнеханов янә “Татнефтехиминвест-холдинг”ның Директорлар советы рәисе итеп сайланды

Бүген Татарстан Президенты Рөстәм Миңнеханов рәислегендә “Татнефтехиминвест-холдинг” ААҖ акционерларының 2009 елда башкарылган эш нәтиҗәләре буенча еллык җыелышы узды.

Холдингның генераль директоры Рафинат Яруллин хисап доклады белән чыгыш ясады. Аның сүзләренә караганда, 2009 ел стратегик карарлар кабул итү елы булды, 2010-2014 елларга исәпләнгән республика нефть һәм газ комплексын үстерү программасы кабул ителде. Кризисны исәпкә алып, программада комплексның продукциясен куллануда эчке базарны үстерүгә басым ясалды. Узган ел, кризиска да карамастан, “Татнефтехиминвест-холдинг” ААҖнә инвестицияләрнең күләме 77 миллиард сумга якын тәшкил итте.

Җәмгыятьнең эшен канәгатьләнерлек дип тапкач һәм еллык хисапны раслаганнан соң, җыелыш “Татнефтехиминвест-холдинг”ның 21 кешедән торган Директорлар советын сайлады. Аңа янә ТР Президенты Рөстәм Миңнеханов, ТР Премьер-министрының беренче урынбасары Равил Моратов, ТР Президентының табигать байлыкларыннан, нефть, газдан файдалану һәм экология мәсьәләләре буенча ярдәмчесе Ирина Ларочкина, ТР Премьер-министрының нефть һәм газ химиясе комплексы мәсьәләләре буенча ярдәмчесе Ренат Сабиров, ТР Кече һәм урта эшкуарлыкны үстерү комитеты рәисе Тимур Шаһивәлиев, ТР Фәннәр Академиясенең фәнни-техник һәм инновацион сәясәт советы секциясе җитәкчесе, КДУ профессоры Ренат Мөслимов керде.

Совет әгъзалары арасында республиканың әйдәп баручы компанияләре җитәкчеләре: “Связьинвестнефтехим” ААҖ дәүләт холдингы генераль директоры Валерий Сорокин, «Татнефть» ААҖ генераль директоры Шәфәгать Тәһаутдинов, аның беренче урынбасары Наил Мәганов, “ТАИФ” ААҖ генераль директоры Альберт Шиһабетдинов, “Түбән Кама Нефтехим” ААҖ генераль директоры Владимир Бусыгин, “Казаноргсинтез” ААҖ генераль директоры Леонид Алехин, “Түбән Кама Шин” ААҖ генераль директоры Радик Ильясов, “Нәфис-Косметикс” ААҖ генераль директоры Дмитрий Хәйбуллин, “Татнефтепродукт” ААҖ генераль директоры Рөстәм Сабиров, “Татнефтехиминвест-холдинг” ААҖ генераль директоры Рафинат Яруллин, “Ак Барс банкы”ның идарә рәисе Роберт Миңнегалиев, “Идея Капитал” идарәче компаниясе” ААҖ генераль директоры Альберт Кәримов, Газпромбанкның Казандагы филиалы идарәчесе Борис Павлов бар.

ТР Премьер-министры Илдар Халиков һәм ТР сәнәгать һәм сәүдә министры Равил Зарипов Директорлар советының яңа әгъзалары булды. ТР сәнәгать һәм сәүдә министры урынбасары Фәрит Туктаров советтан китте.

Рөстәм Миңнеханов тәкъдиме белән Директорлар советына ТР Премьер-минситры урынбасары – ТР энергетика министры Илшат Фәрдиевне сайлауга бәйле рәвештә холдинг акционерларының чираттагы җыелышы үткәреләчәк.

Җыелыштан соң узган Директорлар советының беренче утырышында Рөстәм Миңнеханов янә аның рәисе итеп сайланды. “Минем кандидатура элегрәк Татарстанның беренче Президенты Минтимер Шәймиев тарафыннан тәкъдим ителгән иде, мин мондый әһәмиятле орган эшендә катнашу республика җитәкчесе өчен файдалы дип саныйм”, - диде республика башлыгы.

Шуның белән бергә, Рөстәм Миңнехановның сүзләренә караганда, ТР Премьер-министры Илдар Халиков эшнең җаена төшенгәч, “Татнефтехиминвест-холдинг” ААҖ Директорлар советын җитәкләячәк.

Директорлар советында холдингның генераль директоры Рафинат Яруллинның вәкаләтләре озайтылды һәм кайбер проектлар каралды.