Беларусь Татарстан белән тауар әйләнешенең артуына исәп тота

Беларусь Татарстан белән тауар әйләнешенең артуына исәп тота. Бүген Беларусь Премьер-министры Сергей Сидорскийның Татарстан Президенты Рөстәм Миңнеханов белән очрашуы вакытында сүз әнә шул хакта барды.

“Белта” агентлыгы хәбәр иткәнчә, очрашу башында Сергей Сидорский Россиядәге янгыннар нәтиҗәсендә кешеләр үлүгә бәйле рәвештә кайгы уртаклашуын белдерде. “Без Беларусь Республикасында Россия Федерациясе төбәкләрендә чыккан янгыннар нәтиҗәсендә кешеләрнең үлүенә бик борчылабыз. Шәхсән үз исемемнән һәм Хөкүмәт әгъзалары исеменнән табигать бәла-казасыннан зыян күрүчеләрнең барысының да тирән кайгысын уртаклашам”, - диде ул.

Белоруссия Премьер-министры шулай ук уңайсыз һава шартлары нәтиҗәсендә Татарстанның агросәнәгать комплексында килеп туган вәзгыять белән танышуын билгеләп үтте. “Без бүген Татарстанга ярдәм итә алачак мәсьәләләр хакында фикер алышырга әзер”, - диде ул һәм инде берничә көн Белоруссиядә Татарстан Авыл хуҗалыгы һәм азык-төлек министрлыгы, башка ведомстволарның вәкилләре эшләвен әйтте.

Сергей Сидорский искәртеп узганча, быелның май аенда аның Татарстанга визиты барышында яклар 2009 елда икътисади кризис нәтиҗәсендә кимегән тауар әйләнешен арттыру турында килешкән. “Без очрашу нәтиҗәләре буенча беркетмәгә кул куйдык, анда хуҗалык эшләре белән шөгыльләнүчеләрнең продукция белән тәэмин итү, уртак производстволар булдыруда катнашу мөмкинлекләрен киңәйттек”, - дип ассызыклады Беларусь Хөкүмәте башлыгы.

Бүгенге очрашу барышында яклар шулай ук май аенда Казанда сөйләшенгән башка планнарның (аларга сәнәгать, нефть химиясе өлкәсендә хезмәттәшлекне үстерүгә бәйлеләре дә керә) үтәлеше хакында фикер алышырга планлаштырды. Аерым алганда, Беларусь Хөкүмәте делегациясенең Татарстанга сәфәре барышында 2010-2011 еллар дәвамында Казанга 150 троллейбус, 100 трамвай һәм “МАЗ” автобуслары китерү турында килешү төзүгә ирешелде. Беларусь ягы техника сатып алуны финанслауның берничә схемасын тәкъдим итте.

Татарстан ягының үтенече буенча “Белкоммунмаш” ААҖ 2010 елның октябрь ахырына кадәр 30 троллейбус китерү графигын тәкъдим итте. Татарстан җитәкчелеге тарафыннан графикны тикшерү нәтиҗәләре буенча “Россия саклык банкы” ААҖ аша лизинг схемасы буенча 28 троллейбус сатып алу турында килешенде.

Май аенда шулай ук 2010 елда Татарстанда 5 мең “Беларус” тракторы һәм 50 ашлык суктыру комбайны җыю турында килешү имзаланды. 2010 елның 7 ае нәтиҗәләре буенча 1343 трактор җыелды.

2010 елның гыйнвар-июнь айларында Беларусь Республикасы һәм Татарстан Республикасы арасында сәүдә әйләнеше 415,4 миллион доллар тәшкил итте һәм узган елның шул чоры белән чагыштырганда 9,3 процентка артты.