Рөстәм Миңнеханов: “Татарстан һәм Венесуэланың хезмәттәшлек итү кыры гаять зур”

Татарстан һәм Венесуэлага ике яклы хезмәттәшлекне үстерергә кирәк. Бүген Татарстан Президенты Рөстәм Миңнеханов Венесуэланың Россиядәге Гадәттән тыш һәм Тулы вәкаләтле илчесе Уго Хосе Гарсия Эрнандес белән очрашуда әнә шулай дип белдерде.

Венесуэла делегациясе Татарстанга ике көнлек визит белән килде. Кичә кунаклар Чаллы һәм Зәйдә булды, бүген исә Казанның сәнәгый потенциалы белән танышты.

Очрашуны ачып, Рөстәм Миңнеханов Венесуэла һәм Татарстанның нефть чыгару төбәкләре булуын ассызыклады. “Бездә бу өлкәдә гаять зур тәҗрибә тупланган. Безнең “Татнефть” компаниясе моннан берничә көн элек 60 еллыгын билгеләп үтте”, - дип хәбәр итте Р.Миңнеханов.

Моннан тыш, Татарстан Венесуэлага вертолетлар да сата. Рөстәм Миңнеханов билгеләп үткәнчә, соңгы елларда Казан вертолет заводы Венесуэлага 40 тан артык вертолет җибәргән, әлеге илнең 200 дән артык пилоты заводта белемен арттырган.

“Әгәр сез “КАМАЗ”га игътибар юнәлтсәгез, бу да безнең өчен кызыклы булыр иде. Без биредә җитештерелгән автомобильләр көндәшлеккә сәләтле, дип саныйбыз”, - диде Рөстәм Миңнеханов.

Республика Президенты шулай ук Венесуэлага Татарстаннан газ суырту җиһазлары, Яшел Үзән судно төзү заводы, энергетика предприятиеләре, компрессор заводы, “Алнас” предприятиесе продукциясен сатып алу мөмкинлеген карарга тәкъдим итте.
“Иң мөһиме, Венесуэла капиталы катнашында, сезнең чимал – кофе һәм какаоны кулланып уртак предприятиеләр булдырырга кирәк”, - дип белдерде Татарстан башлыгы.
Рөстәм Миңнеханов Венесуэла ягына мәгариф өлкәсендәге хезмәттәшлек перспективаларына аерым игътибар юнәлтергә чакырды. Татарстан Президентының сүзләренә караганда, Латин Америкасы иле студентлары Казан вузларында укый алыр иде.

“Татарстан һәм Венесуэланың хезмәттәшлек итү кыры гаять зур”, - дип сүзен йомгаклады Рөстәм Миңнеханов.

Үз чиратында, Уго Хосе Гарсия Эрнандес җылы кабул иткәне өчен Татарстан башлыгына рәхмәт белдерде. “Иртәгә без Мәскәүгә зур канәгатьлек хисе белән китәчәкбез, чөнки республикагыз бездә зур тәэсир калдырды”, - дип белдерде Венесуэла илчесе. Уго Хосе Гарсия Эрнандес фикеренчә, аны Татарстанда ислам һәм православиеның дус-тату яшәве гаҗәпкә калдырган.

“Без ике яклы мөнәсәбәтләрне икътисад өлкәсендә карау белән генә чикләнергә тиеш түгел, - дип ассызыклады Уго Хосе Гарсия Эрнандес. – Мәгариф өлкәсендәге хезмәттәшлек тә бик мөһим”. Илче әфәнде билгеләп үткәнчә, Россия Венесуэла стдуентлары өчен 50 стипендия бүлеп биргән һәм аларның Татарстан вузларында белем алу мөмкинлеген карарга кирәк.

Очрашу ахырында Рөстәм Миңнеханов Татарстан һәм Венесуэла арасындагы элемтәләрне алга таба җайга салу өчен күрсәтмәләр бирергә вәгъдә итте.