Казан Россия Федераль салым хезмәте коллегиясен кабул итә

Бүген Казанда Федераль салым хезмәтенең 2010 елның беренче яртыеллыгындагы эш нәтиҗәләренә багышланган киңәйтелгән коллегия утырышы узды. Утырышны Федераль салым хезмәте рәисе Михаил Мишустин үткәрде, коллегия эшендә Татарстан Президенты Рөстәм Миңнеханов катнашты.

Үзенең кереш чыгышында Рөстәм Миңнеханов Федераль салым хезмәте коллегиясен үткәрү урыны сыйфатында Казанны сайлаганы өчен Михаил Мишустинга рәхмәт белдерде. “Мин моның сәбәбе Татарстан Республикасының Россия Федерациясе бюджетын формалаштыруда уйнаган ролендә дип уйлыйм”, - диде ТР Президенты.

Татарстан башлыгы утырышта катнашучыларга республика икътисадының хәзерге торышы һәм перспективалары хакында хәбәр итте. Ул билгеләп үткәнчә, 2000-2008 елларда Татарстанда тотрыклы югары үсеш темпы күзәтелгән, бу вакыт эчендә тулаем төбәк продуктының еллык уртача үсеше - 7,5, сәнәгый җитештерү индексы 6 процент тәшкил иткән. Бу вакыт эчендә реаль акча керемнәре елына 14,4 процентка арткан.

Кризис вакытында Татарстан федераль Хөкүмәт ярдәмендә тискәре нәтиҗәләрне киметүгә иреште һәм 2010 елда икътисадның хәле яхшырды. Тулаем төбәк продукты үсеше - 6,2, сәнәгый җитештерү индексы 8 процент тәшкил итә. “Боларның барысы да Россия Федерациясе һәм республика бюджетларындагы салым керемнәрендә турыдан-туры чагылыш тапты”, - дип ассызыклады Р.Миңнеханов.

2010 елның беренче яртыеллыгында республика территориясенә 100 миллиард сумнан артык салым кереме килгән. ТР Президенты билгеләп үткәнчә, биредә Федераль салым хезмәтенең Татарстан Республикасы буенча идарәсе хезмәткәрләренең өлеше зур. “Безнең территориаль идарәнең салым органнары системасында иң яхшы идарә буларак күп мәртәбәләр билгеләп үтелүе очраклы хәл түгел”, - диде Рөстәм Миңнеханов.

Ул салым керемнәрен арттыру буенча берничә эш юнәлешен билгеләде. Мисал өчен, Рөстәм Миңнеханов фикеренчә, әлеге юнәлешләрнең берсе – милек салым базасын арттыру. Президент сүзләренә караганда, Татарстанда миллионнан артык җир кишәрлеге исәпкә куелган. Республика җитәкчелеге салым салу базасын алга таба арттыруны мәгълүмати технологияләрне тагын да активрак куллануда күрә. Мисал өчен, Рөстәм Миңнехановның сүзләренә караганда, быел Татарстанда “Геомәгълүмати технологияләр нигезендә күчемсез милеккә салым салуга мониторинг үткәрү һәм исәпкә алу” дигән сынау проекты эшли башлаячак.

Рөстәм Миңнеханов фикеренчә, предприятие табышына салым салуга бәйле мәсьәлә аерым игътибар таләп итә. “Кайбер предприятиеләрнең үз табышларын яшереп калуы берәүгә дә сер түгел, - дип белдерде Татарстан Президенты. – Мондый гамәлләр бюджет керемнәрен киметеп кенә калмый, тулаем алганда икътисадка тискәре йогынты да ясый”. Р.Миңнехановның сүзләренә караганда, бу проблеманы хәл итү өчен республиканың барлык министрлыклары һәм муниципалитетлары җәлеп ителгән, бөтен җирдә баланс комиссияләре үткәрелә, аларда предприятиеләрнең эшчәнлеге тикшерелә.

Рөстәм Миңнеханов коллегиядә катнашучыларның игътибарын салым түләүчеләрнең бер төбәктән икенчесенә күчеп йөрүенә юнәлтте. Шул рәвешчә, республика башлыгы фикеренчә, салым түләүчеләр салымнардан, җыелган бурычлардан һәм планлаштырылган тикшерүләрдән качарга тырыша. “Хокук саклау органнары белән бергәләшеп эш итү генә моны туктатырга ярдәм итәчәк, - дип ассызыклады Рөстәм Миңнеханов. – Бу эштә барлык төбәкләрнең дә катнашуы мөһим”.

Үз чыгышының ахырында Рөстәм Миңнеханов Татарстан Республикасы һәм ТР җитәкчелеге инициативаларына ярдәм күрсәткәне өчен Федераль салым хезмәтенә рәхмәт белдерде.

Рөстәм Миңнеханов Михаил Мишустинга Татарстан Президентының Рәхмәт хатын тапшырды, үз чиратында, Федераль салым хезмәте башлыгы республика Президентын Федераль салым хезмәтенең Мактау грамотасы белән бүләкләде.