2011 елның 1 сентябренә кадәр Татарстанның барлык укытучылары шәхси ноутбуклар алачак

“Укытучыга – компьютер” республика проекты кысаларында Татарстанның 375 мәктәбеннән 13 меңгә якын мөгаллим ноутбук алган. Бүген ТР мәгариф һәм фән министры Альберт Гыйльметдинов Татарстан Премьер-министры Илдар Халиков рәислегендә “Электрон мәктәп” проекты буенча муниципаль берәмлек башлыклары белән видеоконференция режимында узган киңәшмәдә әнә шул хакта хәбәр итте.

Искәртеп узабыз, 2010 елның апрелендә Татарстан Республикасы Президенты инициативасы буенча республикада Укытучы елы кысаларында “Мәктәпкә - компьютер” һәм “Укытучыга – компьютер” дигән проектлар старт алды. Альберт Гыйльметдинов китергән мәгълүматларга караганда, ел башына республиканың меңнән артык мәктәбе 11 меңгә якын заманча компьютер алган һәм үзләренең компьютер паркын тулысынча яңарткан. “Укытучыга – компьютер” республика проекты кысаларында Татарстанның 375 мәктәбеннән 13 меңгә якын мөгаллим ноутбук алган. Министр ассызыклаганча, 2011 елның 1 сентябренә кадәр республиканың барлык укытучылары да ноутбуклар белән тәэмин ителәчәк.

Альберт Гыйльметдинов билгеләп үткәнчә, “Электрон мәктәп” проекты кысаларында белем бирү учреждениеләрен ноутбуклар белән җиһазландыру җитәрлек дәрәҗәдә түгел. ТР мәгариф һәм фән министрының сүзләренә караганда, бүгенге көндә республиканың 47 мәктәбе җепселле-оптик элемтә линиясе буенча Интернетка тоташкан, 2010 ел ахырына кадәр аларга тагын 108 белем учагы өстәләчәк. Ә 2011 елда 500 дән артык укучысы булган барлык мәктәпләр дә Интернетка җепселле-оптик элемтә линиясе буенча тоташыр дип көтелә. Министр хәбәр иткәнчә, Татарстанның 2048 мәктәбе Интернет челтәренә тоташкан, бары тик аз комплектлы мәктәпләр генә искәрмә булып тора. Өстәвенә, 70 мәктәп модемнар алган инде, 3G-технологияләр мәсьәләсе дә хәл ителә.

Илдар Халиков хәбәр иткәнчә, урыннардан укытучыларны "Windows 7" операция системасы буенча эшләргә өйрәтүгә кагылышлы сораулар килә. ТР мәгариф һәм фән министры ассызыклаганча, “Электрон мәктәп” программасы кысаларында педагогларның ИКТ-компетенциясен арттыруга зур игътибар бирелә. Мисал өчен, моннан алдагы елларда укытучыларның 92 проценты мәгълүматлаштыру курслары узган. Персональ ноутбуклар алган 13 меңгә якын мөгаллим белем бирү процессында компьютерларны нәтиҗәле куллану өчен 8 модуль буенча 25 сәгатьлек әзерлек курсы узган. “Без өйрәтү процессын дәвам итәчәкбез – тиздән укытучылар, мәгариф лидерлары өчен "Intel" программасы эшли башлаячак. Аны гамәлгә ашырганнан соң педагогларның компетенциясе артырга тиеш”, - дип ассызыклады ул.

Альберт Гыйльметдиновның сүзләренә караганда, барлык мәктәп сайтларының үрнәкләре булдырылган, шуның нәтиҗәсендә аларны югары дәрәҗәдә эшләп булачак. “Тиздән һәр мәктәптә белем бирү процессы белән идарә итү өчен программа нигезе булдырылачак”, - диде ул.

Республика проекты кысаларында санлы белем бирү ресурслары, югары профессиональ контент эшләү процессы бара. “Булган ресурсларны билгеле бер системага салу эше алып барыла. Моннан тыш, ТР Мәгариф һәм фән министрлыгы һәрбер фән буенча методик кулланма әзерли, министрлык сайтында тикшерелгән чыганаклар урнаштырылган. Шулай ук 400 гә якын санлы белем бирү ресурсы безнең педагоглар тарафыннан эшләнгән”, - дип хәбәр итте министр.

Илдар Халиков ассызыклап үткәнчә, һәр муниципаль район “Электрон мәктәп” программасын гамәлгә ашыруга үз өлешен кертергә бурычлы. Премьер инануынча, муниципаль берәмлек башлыклары программаны гамәлгә ашыруны шәхси контрольгә алырга тиеш. “Сез шәхсән катнашмый торып алга таба хәрәкәт итеп булмаячак, - дип мөрәҗәгать итте ул район башлыкларына. – Шулай ук электрон документлар әйләнеше системасын куллануны контрольдә тоту системасын да ныклап уйларга кирәк”.

“Республикада “Электрон мәктәп” программасы кысаларында кабул ителгән карарлар белем бирүнең сыйфатын арттыру, укытучыларның эшен җиңеләйтү өчен заманча технологияләр кулланырга мөмкинлек бирә, - дип белдерде ТР Хөкүмәте башлыгы. – Республикада һәр укучының, кайсы мәктәптә белем алуына карамастан, мөмкинлекләре тигез булырга тиеш”.