Рөстәм Миңнеханов 2010 елгы Бөтенроссия халык санын алу уңаеннан татарстанлыларга мөрәҗәгать белән чыкты

Татарстан Республикасы Президенты Рөстәм Миңнеханов 2010 елгы Бөтенроссия халык санын алу уңаеннан татарстанлыларга мөрәҗәгать белән чыкты.

'Хөрмәтле ватандашлар!

Ил буенча Бөтенроссия халык санын алу башлана. Яңа Россиядә гомумдәүләт күләмендәге мондый зур чара икенче тапкыр үткәрелә. Аның максаты - җәмгыятебез тормышының объектив сурәтен булдыру. Хуҗалыклар буйлап йөреп, билгеләнгән сорауларга җавап алу халыкның социаль-икътисадый дәрәҗәсен ачыкларга мөмкинлек бирәчәк.

Узган айларда моңа күпъяклы, зур әзерлек эшләре алып барылды, анда хакимиятнең дәүләт һәм муниципаль органнары, республика җәмгатьчелеге катнашты.

Халык санын алу нәтиҗәләре авыл-шәһәрләрнең, барлык муниципаль берәмлекләрнең алдагы социаль-икътисадый үсешен билгеләү, демография һәм миграция процессларын фаразлау, сәламәтлек саклау, пенсия белән тәэмин итү, мәгариф, мәдәният, торак-коммуналь хуҗалык өлкәләрендәге реформаларны дәвам итү, бюджетның барлык дәрәҗәләрен формалаштыру өчен нигез булачак.

Безнең күпмилләтле республикада халык санын алу вакытында халыкның милли һәм тел структурасын ачыклаучы сораулар һәрвакыт зур игътибар уята. Кыскача әйткәндә, сүз Татарстанда яшәүче барлык халыкларының хәзерге милли-мәдәни хәле турында бара.

Шул ук вакытта республиканың Конституциясе буенча татар халкының милли-мәдәни үсешенә һәм бердәмлегенә аеруча әһәмият бирелә. Бу кешеләрнең чынбарлыктагы омтылыш-теләкләрен чагылдыра һәм җәмгыять тарафыннан хуплана.

Татарстан Республикасында милли сәясәт һәрвакыт барлык халыкларның мәнфәгатен күздә тотып, җәмгыятьнең рухи халәтен исәпкә алып үткәрелә. Татарстан Республикасының Милли сәясәт концепциясе дә нәкъ менә шуңа юнәлтелә. Һичшиксез, республиканың дәүләт хакимияте органнары киләчәктә бу принципларга тугры булачаклар.

Халык санын алу “Россиягә һәркем мөһим” дигән лозунг белән уза. Барлык татарстанлыларга мөрәҗәгать итеп, халык санын алуда һәркемне актив катнашырга чакырам. Аның уңышлы үтүе, объектив булуы һәм нәтиҗәләре бары тик үзебездән тора.