Рөстәм Миңнеханов ТР статистика органнары хезмәткәрләрен һөнәри бәйрәмнәре белән котлады

Татарстан Республикасы Президенты Рөстәм Миңнеханов республикабызның статистика органнары хезмәткәрләрен һөнәри бәйрәмнәре – Бөтендөнья статистика көне белән котлады.

ТР Президентының котлавында болай диелә:

“Республикабызның статистика органнары хезмәткәрләрен һөнәри бәйрәмнәре белән ихлас күңелдән котлыйм. Әлеге бәйрәм Берләшкән Милләтләр Оешмасы Генераль Ассамблеясы карары нигезендә 2010 елның 20 октябрендә билгеләп үтелә.

Әлеге карар статистика хезмәтенең глобаль икътисадны үстерүдәге әһәмиятен һәм җитди эшчәнлеген тану, аның хезмәткәрләренең һөнәри осталыгы һәм эшкә бирелгәнлегенә тирән хөрмәт билгесе булып тора.

Дөрестән дә, бүген яхшы оештырылган, иң заманча техника белән җиһазландырылган статистика органнарыннан башка ил һәм төбәкләрнең социаль-икътисади үсешенә сыйфатлы мониторингны да, яхшылап уйланылган һәм перспективалы үсеш планнарын да күз алдына китереп булмый.

Бу көнне эшчәнлекләре һәрвакытта да оперативлык, җаваплылык, үз алдындагы бурычларга иҗади якын килү белән аерылып торган Татарстан статистикасының данлы традицияләре турында мактау сүзләре әйтергә кирәк.

Статистика органнары хезмәткәрләре һөнәри бәйрәмнәрен халык санын алуны оештыру һәм үткәрү буенча кызу эш вакытында каршылый. Бу процесска тармак белгечләре генә түгел, меңләгән волонтерлар да җәлеп ителгән. Халык санын алу нәтиҗәләре буенча без татарстанлыларның тормыш-көнкүреше, аларның социаль хәле, үзләренең этник һәм тел статусларын ничек билгеләүләре хакында яхшырак беләчәкбез. Боларның барысы да икътисади һәм социаль-мәдәни карарлар кабул итү өчен кирәк.

Татарстанда җанисәп иң югары дәрәҗәдә узар дип өметләнәм, әлеге мөһим чараны оештыручылар һәм анда катнашучыларга уңышлар теләп калам.

Хөрмәтле дуслар!

Илебез алдында – иҗтимагый үсештә яңа җаваплы чор. Татарстан, Россия Федерациясенең динамик үсеш кичерүче субъекты буларак, бу планнарны үтәргә, яңалык һәм инициатива үрнәге күрсәтергә омтыла. Боларның барысында да вакыйгаларны саннар теле белән төгәл чагылдыру аеруча мөһим.

Татарстан статистика органнарының барлык хезмәткәрләренә ныклы сәламәтлек, бәхет, иминлек, эшләрендә уңышлар телим.

Татарстан Республикасы Президенты Рөстәм Миңнеханов”.