Казан һәм Алжирның Тлемсен каласы тугандаш шәһәрләр булачак

Бүген Татарстан Республикасы Президенты Рөстәм Миңнеханов ТР Министрлар Кабинетында Алжир халык демократик республикасының Россия Федерациясендәге Гадәттән тыш һәм Тулы вәкаләтле илчесе Смәил Шерги белән очрашты.
“Соңгы вакытта без ислам дөньясына аерым игътибар бирәбез. Бездә ислам дөньясы илләре һәм Халыкара оешмалары белән яхшы мөнәсәбәтләр урнашты”, - дип ассызыклады очрашуда Рөстәм Миңнеханов. Аның сүзләренә караганда, Алжир илчесенең Татарстанга визиты ике яклы хезмәттәшлекне ныгытуга хезмәт итәчәк.
Очрашу тәмамланганнан соң ТР Президентының Тышкы элемтәләр департаменты директоры – ТР Президентының Халыкара мәсьәләләр буенча ярдәмчесе Тимур Акулов журналистларга белдергәнчә, Алжир һәм Татарстан икътисадының нигезен нефть сәнәгате тәшкил итә. Әмма, кызганычка күрә, әлегә ике республика арасындагы хезмәттәшлек теләгән дәрәҗәдә актив үсеш кичерми. Алжир һәм Татарстан ике якка да файдалы хезмәттәшлекнең киңәячәге хакында килеште.
Бүгенге очрашуда Казан һәм Тлемсенның (Алжирның шул исемдәге провинциясе башкаласы) тугандаш шәһәрләр булачагы хакында карар кабул ителде. Татарстан Президенты Алжир делегациясен Казанга чакырды, аның составына Тлемсен провинциясе губернаторы һәм Тлемсен шәһәре мэры, югары уку йортлары җитәкчеләре керәчәк.
Тлемсен 2011 елда ислам мәдәнияте башкаласына әвереләчәк. Рөстәм Миңнеханов карары нигезендә, Татарстан делегациясе киләсе елда Тлемсен шәһәрендә узачак мәдәни чараларда актив катнашыр дип көтелә.