Казанда Татарстан Профсоюзлар федерациясенең XXIV конференциясе узды

Бүген Казанда Татарстан Республикасы Профсоюзлар федерациясенең XXIV конференциясе узды. Аның эшендә Татарстан Президенты Рөстәм Миңнеханов һәм Россия Бәйсез профсоюзлар федерациясе рәисе Михаил Шмаков катнашты.

Конференциядә ТР Профсоюзлар федерациясе рәисе Татьяна Водопьянова төп доклад белән чыгыш ясады. Ул билгеләп үткәнчә, бүгенге көндә республика Профсоюзлар федерациясе Россия һәм якын чит илләрдә иң зур профсоюз берләшмәләреннән санала, ул 900 меңгә якын кешене берләштерә. Хәрәкәтнең яшьләр блогы ныгуы да куанычлы хәл. Агымдагы елда ул яңадан кабул ителгән әгъзалар хисабына 25 процентка киңәйде һәм бүгенге көндә 270 мең кешене тәшкил итә.

Аның сүзләренә караганда, цивилизацияле мөнәсәбәтләрне үстерүгә юнәлдерелгән гамәлләр нәтиҗәсендә республикада социаль партнерлыкның барлык дәрәҗәләрендә хезмәткә хокукны саклауда нәтиҗәле система булдырылды. Соңгы 5 елда республикада уртача хезмәт хакы – 2,4, халыкның яшәү дәрәҗәсе 1,5 тапкыр артты.

ТР Профсоюзлар федерациясе рәисе билгеләп үткәнчә, финанс-икътисади кризис республика профсоюзларының хокук яклау эшчәнлегендә җитди сынау булды. Рәсми рәвештә теркәлгән дистәләрчә мең эшсезләр, күпләп кыскартулар һәм эштән җибәрүләр, хезмәткә булган хокукларны бозу очракларының артуы – кризисның рәсми статистикасы әнә шундый. Соңгы биш ел дәвамында ачыкланган хокук бозулар саны 2,5 тапкыр (2006 елда – 1 мең, 2010 елда – 2,5 мең) артты, аларның 80 проценты кризис чоры белән бәйле.

Профсоюз вәкилләре тарафыннан ел саен 16 меңгә якын тикшерү үткәрелә, хезмәтне саклау өлкәсендә 30 меңнән артык хокук бозу очрагы ачыклана һәм аларны бетерү турында 12 меңнән артык тәкъдим бирелә.

Татьяна Водопьянова билгеләп үткәнчә, ел саен 50 меңгә якын кеше республика профсоюзларының биш дәвалау һәм ял итү йортында үз сәламәтлеген ныгыту мөмкинлегенә ия. Тулаем алганда, соңгы биш елда аларда 228,7 мең кеше дәваланган. Шифаханә лагерьларында, шулай ук “Ана һәм бала” юлламалары буенча 20 меңнән артык бала сәламәтлеген ныгыткан. Профсоюз әгъзалары өчен 20-30 процент күләмендә ташлама бирелә, аннан 9 меңнән артык кеше файдаланган.

Конференциядә профсоюз оешмалары лидерлары хезмәт кешесен борчыган төп мәсьәләләрне билгеләде. Хезмәт хакы күләме, хезмәткә түләүнең минималь күләмен индексацияләү, эшсезлек буенча пособиеләр күләме, энергия чыганаклары һәм торак-коммуналь хуҗалыгына тарифлар арту, балалар бакчаларында урыннар җитмәү - әнә шундыйлардан.

Татарстан Президенты XXIV хисап-сайлау конференциясенә җыелган профсоюзлар хәрәкәтенең лаеклы вәкилләрен ихлас күңелдән сәламләде. Быел республика профсоюзлары үзләренең 90 еллыгын билгеләп үтте. Республика башлыгы фикеренчә, ТР профсоюзлары һәрвакытта да үзләренең төп миссияләрен лаеклы үтәде – хезмәт кешесе мәнфәгатьләре сагында нык торды.

Татарстан башлыгы шушы көннәрдә ТР Дәүләт Советының 24 сентябрьдә яңа бәйрәм – Татарстан Республикасы Профсоюзлар көнен гамәлгә кую турында карар кабул итүен искәртте. “Сезне әлеге карар белән чын күңелдән котлыйм, ул профсоюзлар активының республикабызның социаль-икътисади үсешенә керткән өлешен тану, шулай ук республиканың Татарстанның төп профсоюз форумына үзенчәлекле бүләк тә”, - дип белдерде Рөстәм Миңнеханов.

Аның сүзләренә караганда, соңгы 5 елда Татарстанда сизелерлек үзгәрешләр булды. Республиканың динамик үсеше күп кенә социаль проектларны гамәлгә ашырырга мөмкинлек бирә, бу исә татарстанлыларның яшәү сыйфатына уңай йогынты ясый. Шул ук вакытта икътисади кризис һәм быелгы аномаль эсселек җитди сынау булды.

“Татарстан тотрыклы, гармоник үсештәге, бизнес өчен уңайлы шартлары булган төбәккә әверелергә тиеш”, - дип ассызыклады Рөстәм Миңнеханов.

Татарстан Президенты фикеренчә, республика профсоюзлары социаль-икътисади үзгәрешләргә һәрвакытта да үз реакциясен белдерде. Социаль партнерлык системасы - дәүләт һәм профсоюзлар арасындагы мөнәсәбәтләрнең өлгергәнлеген күрсәтүче иң заманча һәм кирәкле инструмент. Уртак тырышлык нәтиҗәсендә икътисади кризис шартларында хезмәт базарындагы төп проблемаларны хәл итүгә, эшсезлек үсешен контрольгә алуга ирешелде. Бу – мөһим казаныш.

“Әлеге катлаулы чорда республика җитәчелегенә күрсәткән ярдәмнәре өчен профсоюзларга аерым рәхмәт сүзләре әйтәсем килә, – диде Рөстәм Миңнеханов. – Хөрмәтле делегатлар һәм республиканың профсоюз активына чын күңелдән ныклы сәламәтлек, иминлек телим”.

XXIV хисап-сайлау конференциясендә ТР Президенты профсоюз активистларына Татарстан Республикасының дәүләт бүләкләрен тапшырды.