Рөстәм Миңнеханов Малайзиядә Путраджая административ үзәген һәм “Сепанг” Халыкара автодромын карады

Бүген Татарстан Республикасы Президенты Малайзиягә эш визиты кысаларында “Путраджая” корпорациясе рәисе Тан Сри Шәмсетдин Осман белән очрашты.

Путраджая шәһәре башлыгы Татарстан Республикасы делегациясе өчен презентация үткәрде, дәүләт учреждениеләре эшчәнлеген локальләштерү һәм оештыру мәсьәләсенә карата үз фикерен белдерде.

Путраджая – Малайзия башкаласы Куала-Лумпур шәһәреннән 20 чакрым көньякта урнашкан Малайзиянең яңа административ үзәге. Үзәккә 1995 елның 19 октябрендә нигез салынган. Биредә Малайзия Премьер-министры һәм Хөкүмәтенең резиденциясе урнашкан. Федераль территория статусына ия. Шәһәрдә 70 меңнән артык кеше яши.

Кала үзенчәлекле “шәһәр бакчасы” буларак уйланыла, биләгән мәйданының 40 проценты урман-парк зоналары өчен резервацияләнгән. Планга шулай ук ачык киңлекләр һәм киң бульварлар челтәре дә кертелә. Төзелеш эшләре 1995 елның августында башлана, ул Малайзиядәге иң зур һәм Көньяк-Көнчыгыш Азиядәге иң эре проектларның берсе була. Проект Малайзия компанияләре тарафыннан эшләнә һәм гамәлгә ашырыла, бары тик 10 процентын гына чит илләрдән кертелгән материаллар тәшкил итә.Экологияне саклауга йөз тоткан Путраджаяның уникаль үзенчәлекләре рәтенә ясалма күл, тематик спорт һәм яшел паркларны (мисал өчен, җиләк-җимеш агачлары паркы, авыл хуҗалыгы культуралары паркы, тигезлек флорасы паркы) кертергә мөмкин. Тан Сри Шәмсетдин Осман ассызыклап үткәнчә, мондый парклар мәктәп укучылары өчен белем һәм тәрбия бирүдә зур роль уйный. Ул шулай ук Путраджаяның шәһәр халкын иҗтимагый активлыкка җәлеп итәргә омтылуын билгеләп үтте. Бу уңайдан даими рәвештә бәйрәмнәр, мәдәни чаралар, конференцияләр, социаль әһәмияткә ия проблемалар буенча җәмәгать тыңлаулары үткәрелә.

Татарстан Республикасы делегациясе әгъзалары зур кызыксыну белән Путраджаяның инфраструктурасы һәм шәһәр төзелеше карарлары белән танышты.

Шуннан соң Рөстәм Миңнеханов һәм аны озатып йөрүче затлар “Сепанг” Халыкара автодромын карады. Танышу барышында кунакларга автодромның техник һәм инфраструктур үзенчәлекләре күрсәтелде, ярышларны оештыру һәм үткәрү буенча аңлатмалар бирелде. Рөстәм Миңнеханов мотоциклет узышларында катнашучы спортчылар белән аралашты һәм истәлек китабында үз язмасын калдырды.