Президент Рөстәм Миңнеханов җитәкчелегендәге ТР рәсми делегациясе Новосибирскида

Президент Рөстәм Миңнеханов җитәкчелегендәге ТР рәсми делегациясе бу көннәрдә Новосибирскида. Делегация составында – Премьер-министр урынбасары-мәдәният министры Зилә Вәлиева, Премьер-министр урынбасары-мәгълүматлаштыру һәм элемтә министры Николай Никифоров, сәнәгать һәм сәүдә министры Равил Зарипов, шулай ук эшлекле даирә вәкилләре, фәнни җәмәгатьчелек бар.

Сәфәр программасында В.Чкалов исемендәге Новосибирски авиация-җитештерү берләшмәсендә, Академия шәһәрчегендәге технопаркта, Г.Боресков исемендәге Катализ институтында булу каралган. Моннан тыш, Татарстан делегациясе Россия фәннәр академиясе Себер бүлегенең Күргәзмәләр үзәгендә инновацияле эшләнмәләр экспозициясе белән танышачак, өлкәнең татар иҗтимагый оешмалары активы белән очрашачак. ТР Президентының матбугат хезмәте хәбәр иткәнчә, сәфәр кысаларында өлкә губернаторы Василий Юрченко белән очрашу ниятләнә, Россия фәннәр академиясенең Себер бүлеге белән “Татнефтехиминвест-холдинг” ААҖ арасында хезмәттәшлек Килешүе, делегациянең өлкәгә сәфәре нәтиҗәләре буенча Ниятләр беркетмәсе имзаланачак.

Татарстан белән Новосибирски өлкәсе арасында хезмәттәшлек дистә елдан артык дәвам итә. Ул 1999 елдан бирле Икътисади-сәүдә, фәнни-техник, мәдәни багланышлар турындагы Килешүгә нигезләнә. Ике арада товар әйләнеше күләме 1999 елда 171,3 млн. сум тәшкил итсә, узган ел 2,6 млрд. сум булган. Яңа Килешүне әзерләү һәм имзалау төбәкләр арасындагы товар әйләнеше күләмен арттырырга ярдәм итәчәк. Сибкрай.ру сайты хәбәрләренә караганда, өлкә губернаторы Василий Юрченко Татарстан белән Новосибирски икътисадлары стуруктурасындагы охшашлыкны, уртак максатларны билгеләп үткән. Алар – фән һәм инновацияләр үсешеннән, гражданнарның тормыш сыйфатын күтәрүдән гыйбарәт. “Без ике арада булган хезмәттәшлекнең кадерен белеп, төрле өлкәләрдә яңа элемтәләрне актив үстерәчәкбез”, - ди ул.

ТР Президенты Рөстәм Миңнеханов сүзләренә караганда, төбәкләр бер үк максат белән яши. “Предприятиеләребез өлкәнең фәнни-тикшеренү үзәкләрнең партнеры. Бу сәфәр хезмәттәшлекне үстерүгә яңа этәргеч бирергә мөмкин”, -дип саный Татарстан башлыгы.