Бүген “Пирамида”да фән һәм эшмәкәрлекне хөрмәтләү тантанасы узды

Бүген “Пирамида”да фән һәм эшмәкәрлекне хөрмәтләү тантанасы узды. Биредә “Татарстан Республикасы өчен иң яхшы илле инновацияле идея”республика конкурсының быелгы җиңүчеләрен бүләкләделәр. Бәйрәм тантанасында ТР Президенты Рөстәм Миңнеханов, Премьер-министр Илдар Халиков, “Россия венчур компаниясе” ААҖ инвестицияләр һәм экспертиза директоры Ян Рязанцев, Россия туры һәм венчур инвестицияләре ассоциациясе башкаручы директоры Альбина Никконен һ.б. катнашты.

“Татарстан Республикасы өчен иң яхшы илле инновацияле идея” дигән быелгы VΙ республика бәйгесенә апрель аенда старт бирелгән иде. ТР Инвестиция-венчур фонды белән Фәннәр академиясе уздыра торган бу традицион чараның масштаблары елдан-ел киңәя. 2005 елда конкурска 490 заявка, 2006 елда – 621, 2007 елда – 694, 2008 елда - 813, 2009 елда 1279 проект тәкъдим ителгән булса, быел алынган заявкалар саны 1503 кә җиткән. Аларны Россиянең 20 дән артык төбәгеннән, Украинаның 3 шәһәреннән вузлар, Россия Фәннәр академиясенең академик институтлары, ТР Фәннәр академиясе, предприятиеләр, технопарклар, Уйлап табучылар һәм рационализаторлар җәмгыяте тәкъдим иткән. ТР Инвестиция-венчур фонды директоры Айнур Әйдельдинов иң күп заявкаларның наносистемалар һәм материаллар индустриясе, авыл хуҗалыгы, экология, һәм табигатьтән файдалану, мәгариф, азык сәнәгате, биотехнологияләр, ветеринария юнәлешләре буенча алынганын ассызыклады. Заявкалар бирүдә ТР Фәннәр Академиясе, Казан дәүләт аграр университеты, Казан дәүләт техник, технология университетлары лидерлар санала. Предприятиеләр арасында нефть чыгару һәм ятмаларның нефть бирү сәләтен арттыруга кагылышлы проектлар тәкъдим итүче һәм кулланылышка кертүче “Татнефть”җәмгыяте лидер.

Быел конкурска алынган эшләр җиде юнәлеш -“Перспектива”, “Инновацияләр старты”, “Наноимпульс”, “Хезмәттәшлек”, “Елның иң яхшы ачышы”, “ТР социаль-икътисади үсеше”, “Мәгарифтә инновацияләр” номинацияләре буенча бәяләнде. Экспертлар тарафыннан һәр номинация буенча иң яхшы 10-15 эш аерып алынган. Нәтиҗәдә, бүген “Пирамида” сәхнәсе түренә иң яхшы 151 проект авторы чакырылды.

Мәктәп укучыларының инновацияле фәнни-техник эшләре кабул ителә торган “Перспектива” номинациясе җиңүчеләрен ТР Президенты Рөстәм Миңнеханов бүләкләде. “Безнең төп теләк инновацияләр үсеше, инновацион тирәлек булдыру иде. Бу еллар эчендә әлеге юнәлештә күп эшләр башкарылды, ләкин әле бу юлның башы гына”,- дип саный Президент. Узган елларда инновацияләр үсешендә республикада ирешелгән төп казаныш дип, Рөстәм Миңнеханов Россиядә һәм аннан читтә ярдәм итәргә әзер булган партнерлар табуны һәм үсеш өчен кирәк булган инновацияле инфраструктура булдыруны атады. “Федераль, илкүләм тикшеренү университетлары төзесәк тә, идеяләрне тормышка ашыру, тагын да зуррак нәтиҗәләргә ирешү республика предприятиеләренең актив роленнән башка мөмкин түгел”, -дип ассызыклады Татарстан башлыгы. Президент быелгы конкурста катнашучыларның барысына да рәхмәт белдерде. “Тәкъдим ителгән проектларның әлегә барысы да яшәргә сәләтле дә түгелдер, ләкин барлык идеяләр шушыннан башлана. Республика җитәкчелеге инновацияләр үсешенә ярдәм итеп килде һәм бу алга таба да дәвам итәчәк. Географияне тагын да киңәйтеп, партнерлар, элемтәләр табачакбыз”, - ди Рөстәм Миңнеханов.

“Перспектива” номинациясе җиңүчеләренә килгәндә, иң яхшы 10 проект авторы кубоклар һәм 25 әр мең сум күләмендә акчалата премия белән бүләкләнде. Алар арасында ионнар ярдәмендә суны эшкәртү сыйфатын арттыру проектын тәкъдим иткән Гөлнур Вафина, информатикадан БДИ га әзерләнү буенча электрон-методик комплекс әзерләгән Оксана Пайзе һ.б. бар.

“Фәнни-техник проблемаларны чишүгә йөз тотучы проектлар катнашкан “Инновацияләр старты” номинациясендә иң яхшы 15 проект авторы бүләкләнде. Аларны бүләкләү өчен сәхнәгә “Россия венчур компаниясе” ААҖ инвестицияләр һәм экспертиза директоры Ян Рязанцев күтәрелде. Бу номинация җиңүчеләренә кубоклар һәм 50 шәр мең сумлык премия тапшырылды. Нанотехнологияләр өлкәсенә караган проектлар катнашкан “Наноимпульс” номинациясендә иң яхшы 10 проект авторы шулай ук алтын кубоклар һәм 50 шәр мең сум премия белән бүләкләнде. “ТР Социаль-икътисади үсеше” номинациясендә республиканың социаль-икътисади һәм гуманитар үсешенә юнәлдерелгән проектлар бәяләнде. Нәтиҗәдә, иң яхшы 10 проект сайлап алынган. Алар арасында Гүзәл Петрованың “Татарстанның көньяк-көнчыгыш төбәге бистә-авылларын су белән тәэмин итү проблемасын чишү”, Лилия Фәйзуллинаның “ТР төзелеш комплексын инновацияләргә нигезләнеп үстерү стратегиясен эшләү” проектлары да бар. Бу номинация җиңүчеләре кубоклар һәм 50 шәр мең сумлык премияләр алды. ТР сәнәгать предприятиеләре алдында торган проблемаларга чишелеш эзләүче проектлар “Хезмәттәшлек” номинациясендә бәяләнде. Иң яхшы 10 проект авторларына кубокларны Россия туры һәм венчур инвестицияләре ассоциациясе башкаручы директоры Альбина Никконен тапшырды. Алар шулай ук 50 шәр мең сум күләмендә премиягә лаек булды. “Елның иң яхшы ачышы”, “Мәгарифтә инновацияләр” номинацияләрендә җиңгән иң яхшы унышлар проект авторы шулай ук алтын кубок һәм 50 шәр мең сум күләмендә премия алды.

Быел да конкурсны оештыруда катнашкан “Ак Барс” банкы”, “Татнефтехиминвест-холдинг”,“Связьинвестнефтехим” ААҖ бәйгедә катнашучыларга үз премияләрен һәм исемле стипендияләрен булдырган. “Ак Барс” банкы 30 ар мең сумлык 10 исемле премия, “Татнефтехиминвест-холдинг” ярты ел дәвамында 5 әр мең сумлык 10 исемле стипендия, “Связьинвестнефтехим” шул ук чорга һәм шул ук суммадагы 10 стипендия бирә.

Ел саен “Татарстан Республикасы өчен иң яхшы илле инновацияле идея” конкурсы кысаларында “Идея-1000” инновацияле проектлар программасы буенча да сайлап алу үткәрелә. Бүген “Яшьләр инновацияле проекты”, “Старт-1”, “Старт-2” номинацияләрендә җиңгән 51 автор бүләкләнде. Бүген шулай ук “Бизнес-Партнер” программасы бәйгесендә җиңгән 6 проект исеме дә игълан ителде.