2010 елда Татарстанда 43 615 кеше алимент түләүдән баш тарткан

2010 елда Республика суд приставлары хезмәтенә 22 млрд. 439 млн. сумлык 1 миллионнан артык башкарма производство тапшырылган. Бер пристав бер ай эчендә уртача 199 суд карарын тормышка ашырган, ягъни теге яки бу өлкә буенча бурычларны җыеп алу юнәлешендә эш алып барган. Бу хакта бүген ТР Министрлар Кабинетында узган матбугат очрашуында Суд приставлары федераль хезмәтенең Татарстан Республикасындагы идарәсе башлыгы – баш суд приставы Хәмит Шәрипов белдерде.

Агымдагы елда алиментлар буенча суд карарлары 43 мең 615кә җиткән. Шуның 23 мең 284е тормышка ашырылган. 15 меңгә якын кешенең хезмәт хакыннан алимент түләүләрен тотып калу турында документлар тутырылган. Алимент түләүдән качып йөрүчеләргә карата 649 җинаять эше кузгатылган.

Республика суд приставлары хезмәтенә хезмәт хакы буенча бурычларны түләттерү юнәлешендә 30 мең 861 суд карары тапшырылган. Бу карарлар буенча бурычлар 607 млн. 531 мең сум тәшкил иткән. 20 мең 674 суд карары буенча 276 млн. 282 мең сум акча түләттерелгән.

2010 елда хезмәт хакы буенча бурычларны түләттерү юнәлешендә Республика суд приставлары хезмәте бурычлыларның милкен алу өлкәсендә 111 карар чыгарган. Әлеге категория буенча алынган милек 36 млн. 305 мең сум тәшкил иткән. 52 вазыйфаи зат административ җаваплылыкка тартылган.