“Кеско” компаниясен ТР нефть, газ, химия комплексы предприятиеләре белән хезмәттәшлек кызыксындыра

“Кеско” компания җитәкчелеген Татарстанның нефть, газ, химия комплексы предприятиеләре белән хезмәттәшлек кызыксындыра. Бу хакта бүген ТР Президенты Рөстәм Миңнехановның “Кеско” ҖЧҖ (“АТЭК” компанияләр төркеменә керә) генераль директоры Евгений Бидило белән очрашуы вакытында сүз булды. Анда ике арада хезмәттәшлек перспективалары каралды.

Татарстан Президенты белдергәнчә, нефть, газ, химия комплексы предприятиеләренең үсеше Татарстан өчен актуаль тема. Рөстәм Миңнеханов “Кеско”ның “Татнефтехиминвест-холдинг” белән хезмәттәшлегенең сизелерлек нәтиҗәләр бирүен ассызыклап, аны дәвам итәргә кирәклеген искәртте.

“Татнефтехиминвест-холдинг”ААҖ генераль директоры Рафинат Яруллин хезмәттәшлекне оештыру турында хисап тотты. Аның сүзләренә караганда, Татарстаннны “АТЭК” компанияләр төркеменә керүче “Акрилат” ҖЧҖ җитештергән акрил кислотасы, аның нигезендә җитештерелүче яңа продукция кызыксындыра. Рафинат Яруллин акрил кислотасының “Нәфис-Косметикс” компаниясе производствосында, янгын сүндерү өлкәсендә яңа продуктлар эшләүдә кулланылуын искәртте.

“АТЭК” компанияләр төркеме вәкилләре ТР Президентына компаниянең төзелеш тарихын, үсеш юнәлешләрен бәян итте. Алар, беренче чиратта, нефть һәм нефть химиясе продуктларын сату, химия производствосы, авыр нефть калдыкларын эшкәртү һәм коксны (казылмаларны эшкәртү калдыкларын) реализацияләү, күчемсез милеккә инвестицияләр салудан гыйбарәт. Рөстәм Миңнеханов хезмәттәшлекне алга таба җәелдерү өчен эшче төркем төзү тәкъдимен кертте. Аның сүзләренә караганда, “Татнефть”, “ТАИФ” җәмгыятьләре “АТЭК” компанияләр төркеменең файдалы казылмаларны акрын тизлектә югары температурада таркату проекты буенча тәкъдимнәрен өйрәнергә тиеш.