Муниципалларның да үз медале булачак

Бүген дүртенче чакырылыш ТР Дәүләт Советының унбишенче утырышында депутатлар, республикада “Муниципаль хезмәт өлкәсе үсешендәге казанышлар өчен” медаль гамәлгә куелу уңаеннан, “Татарстан Республикасы дәүләт бүләкләре турында” ТР Законына үзгәрешләр кертте.

ТР Президенты аппараты җитәкчесе, ТР Президентының Татарстан парламентындагы вәкаләтле вәкиле Юрий Камалтынов депутатларга ТР Президентының “Татарстан Республикасы дәүләт бүләкләре турында” ТР Законына үзгәрешләр кертү хакында” закон проектын закон чыгару инициативасы тәртибендә кертүен хәбәр итте.

Билгеле булганча, “Муниципаль хезмәт өлкәсендәге казанышлар өчен” күкрәк билгесен гамәлгә кую тәкъдиме белән ТР Муниципаль берәмлекләр советының V съездында совет рәисе Минсәгыйть Шакиров чыкты.

Закон проектыннан аңлашылганча, бу медаль белән Татарстан Республикасында җирле үзидарәне оештыруда һәм үстерүдә зур өлеш керткән затлар бүләкләнә. Аларның җирле үзидарә органнарының нәтиҗәле эшләтүдә, җирле мәсьәләләрне халык мәнфәгатьләреннән чыгып, тарихи һәм башка традицияләрне исәпкә алып хәл итүдә катнашуы зарур.

Әлеге медаль күкрәкнең сул ягына тагыла.

“Татарстан Республикасы дәүләт бүләкләре турында” ТР Законына үзгәрешләр кертү хакында” закон проекты тулаем кабул ителде.