Равил Моратов: “Биналар һәм корылмалар түбәләрен вакытында кардан чистартуны оештыру мөһим”

Бүген ТР Министрлар Кабинетында Премьер-министр вазифаларын башкаручы Равил Моратов рәислегендә Гадәттән тыш хәлләрне кисәтү һәм алар нәтиҗәләрен бетерү, янгын иминлеген тәэмин итү буенча комиссия утырышы узды. Видеоконференция режимында үткән утырышта барлык муниципаль районнар вәкилләре катнашты.

Көн тәртибенә чыгарылган төп мәсьәләләрнең берсе – социаль-мәдәни объектлар түбәләрен, спорт инфраструктурасын һ.б. кардан чистарту иде. Равил Моратов белдергәнчә, бу мәсьәләгә системалы якын килү кирәк. Быелгы мул карлы кышта түбәләрне кардан вакытында арындыру аеруча актуаль.

ТР төзелеш, архитектура һәм торак-коммуналь хуҗалык министрының беренче урынбасары Рәүзил Хаҗиев сүзләренә караганда, Россиянең кайбер төбәкләрендә биналар түбәләренә күп кар җыелу корылмаларның җимерелүенә китерде. 6 гыйнварда шул сәбәпле Казанның Идел буе районында, 9 гыйнварда Әлмәт шәһәрендә дә биналарның түбәсе җимерелү очраклары теркәлгән. Министрның беренче урынбасары искәртүенчә, бүгенге көндә вәзгыять әле катлаулы кала. Районнарда социаль-мәдәни, спорт объектлары, сәүдә үзәкләре һ.б. түбәләрен кардан чистартуга керешкәннәр. Бүген республикада шундый 476 объект (мәктәпләр, тулай тораклар, спорт сарайлары, боз ареналары, сәүдә үзәкләре, кинотеатрлар) исәпләнә.

Утырыш барышында Равил Моратовка спорт объектлары түбәләрен кардан чистартуның барышы турында да мәгълүмат бирелде. 11 гыйнварга булган мәгълүматларга караганда, барлык спорт корылмалары, шул исәптән, Универсиада объектлары да, кардан чистартылган.

Утырышта алдагы көннәргә һава торышы фаразлары да игълан ителде. ТР Гидрометеорология һәм әйләнә-тирә мохитне күзәтү идарәсе җитәкчесе Сергей Захаров сүзләренә караганда, 14 гыйнварда республикада кар яву, көнбатыш районнарда буран чыгу һәм 10 градустан 15 градуска кадәр суык көтелә. Көнчыгыш районнарда һава температурасы минус 20 градуска кадәр төшәчәк. 15 гыйнварда Татарстанда кар, урыны белән буран көтелә. Температура минус 7 - минус12 градус дәрәҗәсендә булачак.