ТР Юстиция министрлыгы халыкка юридик хезмәт күрсәтү эшләрен активлаштырырга ниятли

Бүген Казанда ТР Юстиция министрлыгы коллегиясе узды, анда ТР беренче вице-премьеры Равил Моратов катнашты. Коллегия утырышы видеоконференция режимында узды.

Республика юстиция министры Мидхәт Корманов узган елда министрлыкның башкарылган эшләре һәм агымдагы елга бурычлары турында сөйләде.

Мидхәт Корманов сүзләренә караганда, агымдагы елда 2010 елдагы эшчәнлектән чыгып нәтиҗә ясарга кирәк. “Закон проектлары тармак министрлыклары һәм ведомстволары тарафыннан алдан әзерләнергә, ведомствоара хокукый мәсьәләләр буенча координацион комитетына һәм аның эксперт советына фикер алышу өчен тапшырылырга, тиешле срокка тәкъдимнәрне исәпкә алып эшләп бетерергә, Министрлар Кабинетына закон инициативасы хокукын гамәлгә кую өчен тапшылырга тиеш”, - дип билгеләп үтте министр.

Быел республика ихтыяҗларыннан чыгып, дәүләт хакимиятенең федераль органнары белән гамәлгә куела торган закон проектларын һәм башка норматив эшләргә мониторинг ясауны активлаштырырга кирәк, диде ул.

ТР дөнья судьялары эшчәнлегенең оештыру-хокукый һәм матди-техник ягын тәэмин итүдә файдаланылмаган резервлар бар дип саный, М.Корманов. Дөнья судьялары аппаратын мәгълүматлаштыру чаралары белән тәэмин итүдә сизелерлек алга китеш булса да, суд участокларын урнаштыру, фондның күчемсез милкендә капиталь һәм агымдагы ремонтка кагылышлы проблемалар бар. Агымдагы елда дөнья судьяларының суд участоклары чикләрен билгеләү эшләрен төгәлләргә кирәк. Быел шундый 9 закон проекты әзерләнергә тиеш.

2011 елда җирле үзидарә органнарында юридик кадрлар булдыруда ярдәм итү зарур. “Без һәр авылда консультатив ярдәм күрсәтергә һәм халык белән очрашулар үткәрергә тиеш”, - диде М.Корманов.

43 муниципаль районның 29 ында гына район советы аппаратларында юрист вазифасын башкаручы бар, ә башкарма комитетларда – 23 районда гына. Кайбер районнарда юрист вазифасы штаты бөтенләй юк. “Саннардан күренгәнчә, республика җирле үзидарә органнарының күбесендә квалификацияле юридик кадрлар җитми. Мондый очракта җирле үзидарә органнарын хокук белән тәэмин итүгә җаваплы хезмәтләрне ныгытуга ихтыяҗ бар дигән сүз”, - дип билгеләп үтте ул.

Ә үз чиратында, Равил Моратов: “Әлегә без халык таләпләреннән ерак. Бу юнәлештә актив эш алып барырга кирәк”, - дип белдерде.

Шулай ук ул юстиция министрлыгы хезмәткәрләреннән ятим балалар очраша торган проблемаларга игътибарлы булырга, аларның хокукларын яклауда булышуларын сорады.