Рөстәм Миңнеханов РФ Олимпия комитеты советының яңа составына кергән

Татарстан Республикасы Президенты Рөстәм Миңнеханов РФ Олимпия комитеты иҗтимагый советының яңа составына кергән. Советның яңартылган составы Россия Олимпия комитеты башкарма комитеты тарафыннан расланган.

Искәртеп үтәбез, совет Россия Олимпия комитеты эшчәнлегенә ярдәм күрсәтү өчен булдырылган.

РФ Олимпия комитеты советы рәисе итеп Әхмәд Билалов (Россия Олимпия комитеты вице-президенты, Россия Олимпия комитеты башкарма комитеты әгъзасы, Краснодар крае Законнар чыгару җыены рәисенең беренче урынбасары), ә Виталий Милявский (РФ Президенты Администрациясе идарәсенең баш киңәшчесе) җаваплы секретарь итеп билгеләнгән.

Моннан тыш, РОК иҗтимагый советының яңа составына Россия Олимпия комитеты башкаручы директоры Марат Бариев, “Спорт” Гомумроссия телевизион каналы редакциясенең баш мөхәррире Василий Кикнадзе, РФ Дәүләт Думасының физкультура, спорт комитеты җитәкчесе, РФ Дәүләт Думасы депутаты Антон Сихарулидзе, Бөтенроссия дәүләт теле-радиокомпаниясе генераль директоры Олег Добродеев һәм тагын 20 кеше кергән.