Пенсияләрнең туплам өлешендә җыелган акчаларны республика икътисадын инвестицияләүгә тотарга кирәк

Дәүләт тарафыннан пенсияләрне уртагыннан финанслашу һәм пенсия тупламнарын инвестицияләү программасында 102 мең татарстанлы катнаша, аны гамәлгә ашыруның беренче елында дәүләт үзенең йөкләмәләрен тулы күләмдә үтәде, нәтиҗәдә, 20 меңләп граждан хисабына 55 млн. сум акча салынды. Моннан тыш, шушы программада катнашкан хезмәткәрләренә 26 предприятие үз хисабыннан өстәмә акча күчерә тора. Былтыр Пенсия фондының Татарстан бүлегендә пенсия тупламнары буенча 160 мең гариза кабул ителеп, ел ахырына шушы туплам өлеш 25 млрд. сум тәшкил итте.

Бүген Россия Пенсия фондының Татарстан Республикасы буенча бүлеге идарәчесе Марсель Имамов әлеге бүлек советының узган елгы эш йомгакларына багышланган утырышында шундый һ.б. мәгълүматлар китерде.

Аннан соң чыгыш ясаган ТР икътисад министры Мидхәт Шаһиәхмәтов утырышта катнашкан ТР Премьер-министры Илдар Халиковның игътибарын пенсия тупламнарына юнәлдереп, мондый фикер белдерде. Пенсияләрнең туплам өлешендә җыелган акчаларны республика икътисадын инвестицияләүгә тотарга кирәк, чөнки сумма шактый зур – 25 млрд. сум. Россия Пенсия фонды Татарстан Республикасы буенча бүлеге, дәүләтнеке булмаган пенсия фондлары, ТР Президенты карамагындагы Дәүләт торак фонды белән берлектә гражданнарның пенсия тупламнарын ышанычлы саналган социаль ипотека буенча төзелешкә юнәлтергә кирәк, шул рәвешле, халыкның акчасы тулысынча сакланырлык итеп эш оештыру зарур, диде министр.

Премьер-министр аның белән килешеп, моңа, шулай ук, Россия регионнарын да җәлеп итәргә була, диде.

Татарстан Пенсия фонды бүлегенең гражданнарны кабул итү системасын (анда чиратлар электрон формада, кабул итү кабинкалары файдаланыла, сайтында кызыксындырган мәсьәләләргә җавап табу мөмкинле гамәлдә һ.б.) башка министрлыклар һәм ведомстволарда да булдыру кирәк, чөнки ыгы-зыгы юк, шул ук вакытта эш тә эшләнә, дип тәкъдим итте йомгак сүзендә Хөкүмәт башлыгы.

Утырыш азагында И.Халиков хезмәтендә үзен күрсәтә алган уңышлы хезмәткәрләргә дәүләт бүләкләрен, ә М.Имамов ведомство бүләкләрен тапшырды. Премьер-министр Пенсия фондының 20 еллыгы белән барлык хезмәткәрләрне котлап, нәтиҗәле эшчәнлек теләде.