Рөстәм Миңнеханов чит ил гаммәви мәгълүмат чараларына Татарстанның потенциалын тәкъдим итте

Якындагы перспективада нефть чыгару Татарстан икътисадының нигезе булачак. Кичә Татарстан Президенты Рөстәм Миңнеханов ТР Министрлар Кабинетында узган чит ил гаммәви мәгълүмат чаралары журналистлары белән очрашуда әнә шул хакта хәбәр итте.
Республика Президенты чит ил журналистларын (“Дойчланд радио”, «Ист Ньюс» фотоагентлыгы, Кытай Үзәк телевидениесе, «Синьхуа» мәгълүмат агентлыгы, Кытай халыкара радиосы вәкилләре) татар милли ашлары белән сыйлады һәм Татарстанның потенциалын тәкъдим итте.
Очрашу башында Рөстәм Миңнеханов чит ил гаммәви мәгълүмат чаралары вәкилләренә Татарстанга игътибар күрсәткәннәре өчен олы рәхмәтләрен ирештерде һәм республиканың аларга охшаячагына, Татарстанда еш кунак булачакларына ышаныч белдерде.
ТР Президенты республиканың потенциалы һәм үсеш планнары, аерым алганда, Татарстанда инде 60 елдан артык нефть чыгарылуы, шушы вакыт эчендә 3 миллиард тоннадан артык “кара алтын” табылуы хакында сөйләде. Ел саен 30 миллион тоннадан артык нефть чыгарыла. “2030 елга кадәр без әлеге темпларны сакларга тиеш”, - дип ассызыклады ул.
“Якындагы перспективада нефть чыгару безнең икътисадның нигезе булачак. Шунлыктан без нефть химиясе, нефть эшкәртү мәсьәләләре белән бик җитди шөгыльләнәбез, - дип хәбәр итте республика башлыгы. – Нефть эшкәртү, нефть химиясе һәм машина төзелеше үсеш нокталары булачак”.
“Теләсә кайсы хакимиятнең төп бурычы – яшәү сыйфатын яхшырту, бу мәгариф, медицина, мәдәни хезмәт күрсәтү өлкәләренә кагыла. Мәгарифтә җитди үзгәртеп корулар бара – быел балалар бакчаларында 11 меңнән артык урын булдырылачак; уку елы ахырына кадәр барлык мәктәп укытучыларына ноутбуклар тапшырылачак. Бу мәгарифнең тагын да нәтиҗәле үсешенә җитди этәргеч бирәчәк”, - дип ассызыклады ТР Президенты.
ТР Президенты чит ил гаммәви мәгълүмат чаралары вәкилләренә шулай ук “2013 елгы Универсиада”, “2018 елгы футбол буенча дөнья чемпионаты” проектларын тәкъдим итте. “2011 елда Кытайның Шеньжень шәһәрендә Бөтендөнья универсиадасы узганнан соң безгә югары дәрәҗәне саклау авыр булачак. Шунлыктан без тәҗрибә өйрәнү өчен берничә мәртәбә Шеньжень каласында булдык”, - дип ассызыклады ТР Президенты. Аның сүзләренә караганда, быел 45 мең тамашачыга исәпләнгән футбол стадионыннан тыш, 2013 елгы Уеннарның барлык спорт объектлары да диярлек төзелеп бетәчәк.
Чит ил гаммәви мәгълүмат чаралары вәкилләре ТР Президентына сайлау системасы, Татарстанның туристлык потенциалы, республикада милләтара татулыкны саклау, Украина, Ливия, Кытай белән мөнәсәбәтләргә һәм башка мәсьәләләргә кагылышлы сораулар бирде.