2015 елга “Алабуга” МИЗ да инвестицияләрнең гомуми күләме 100 млрд. сумнан артачак, ә резидент- компанияләр саны 35 кә җитәчәк

2015 елга “Алабуга” МИЗ да инвестицияләрнең гомуми күләме 100 млрд. сумнан артачак, ә биредә теркәлгән резидент-компанияләр саны 35 кә җитәчәк. Бу хакта бүген Мәскәүдә Гайдар форумы кысаларында узган “түгәрәк өстәл” утырышында “Алабуга” махсус икътисади зонасы генераль директоры Василий Кудряшов хәбәр итте.
Инновацион эшчәнлекне үстерү өчен Татарстан мисалында төбәк инфраструктурасын төзү мәсьәләләренә багышланган “түгәрәк өстәл” утырышы ТР Премьер-министры Илдар Халиков җитәкчелегендә узды.
Татарстан Хөкүмәте башлыгы утырышта катнашучылар игътибарын бүген республикада дүрт индустриаль парк, тугыз технопарк, “Химград” технополисы, инвестиция һәм венчур фондлары, шулай ук “Алабуга” махсус икътисади зонасы эшләүгә юнәлтте. “Алабуга” МИЗ үсеше хакында чыгыш ясаган генераль директор Василий Кудряшов бүген биредә 14 резидент-компания теркәлүе, инвестицияләрнең гомуми күләме 30 млрд. сумнан артык булуы хакында мәгълүмат бирде. Аның белдерүенчә, биредә резидент-компанияләр өчен керем салымы ставкасы киметелгән, ирекле таможня зонасында башка ташламалар каралган. Шулай ук сәнәгый, эшлекле, таможня инфраструктурасы төзелү дә компанияләр өчен уңайлыклар тудыра. Агымдагы елның мартына булган мәгълүматларга караганда, “Алабуга” инфраструктурасына инде 14,5 млрд. сумлык инвестицияләр салынган.
Генераль директор аеруча уңышлы үсештә булган резидент-компанияләр арасыннан “Соллерс”ны билгеләп үтте. 2011 ел башына булган мәгълүматларга караганда, компаниянең гомуми инвестицияләр күләме 7 млрд. сумнан артык. “Соллерс”ның үсеше хакында тулы итеп үз чыгышында компаниянең генераль директоры Вадим Швецов бәян итте.
Эшчәнлеген “Химград” технополисында алып баручы компанияләр үзенчәлеге хакында акционерлык җәмгыятенең Директорлар советы рәисе Альберт Кәримов сөйләде. Бүген биредә эшләүче 111 компания барлыгы 6 млрд. сумлык продукция эшләп чыгара.