Александр Мишарин җитәкчелегендәге Свердловск өлкәсе делегациясе “Алабуга” махсус икътисади зонасында булды

Бүген “Алабуга” махсус икътисади зонасы генераль директоры Василий Кудряшов Свердловск өлкәсе делегациясе әгъзаларына икътисади зонаның потенциалын тәкъдим итте.

Искәртеп узабыз, губернатор Александр Мишарин җитәкчелегендәге Свердловск өлкәсе делегациясе бүген Казанга эш визиты белән килде. Көннең беренче яртысында кунаклар 2013 елгы Универсиаданың кайбер объектларында, югары технологияләр өлкәсендәге технопарк - ИТ-паркта һәм башка урыннарда булды.

Шуннан соң Свердловск өлкәсе делегациясе (аларны Татарстан Республикасы Президенты Рөстәм Миңнеханов озатып йөрде) сәнәгать-җитештерү тибындагы “Алабуга” махсус икътисади зонасының мөмкинлекләре белән танышу өчен Алабуга районына юл тотты.
Алабугага килүгә үк Александр Мишарин һәм Рөстәм Миңнеханов “Алабуга” махсус икътисади зонасының Инвестиция программалары дирекциясе тарафыннан әзерләнгән махсус техника экспозициясен карады. Аннары административ корпуста махсус икътисади зонаны тәкъдим иттеләр. “Алабуга” махсус икътисади зонасы генераль директоры Василий Кудряшов икътисади зона үз резидентларына тәкъдим иткән өстенлекләр хакында сөйләде. Бу, аерым алганда, резидент-компанияләр өчен табышка салым ставкасының кимүе, ирекле таможня зонасының башка преференцияләре. Компнаия өчен тагын бер өстенлек – инде булдырылган сәнәгый, эшлекле, таможня инфраструктурасы. Резидентларга энергия ресурслары белән тәэмин итү челтәрләренә бушлай тоташу мөмкинлеге бирелә. 2008 елның апреленнән махсус икътисади зона территориясендә Алабуга таможня посты эшли башлады.

Презентациядән соң кунаклар махсус икътисади зона резиденты - «Прайс-Даймлер – Татнефть – Алабуга Стекловолокно» заводының сәнәгать мәйданчыкларында булды.

Аннары Свердловск өлкәсе делегациясе әгъзалары икенче бер резидент – “Соллерс-Алабуга” ҖЧҖ производствосы белән танышты. Ул “Алабуга” махсус икътисади зонасы территориясендә иң уңышлы үсеш кичерә торган предприятиеләрнең берсе санала.

Свердлоск өлкәсе делегациясен шулай ук ТР сәнәгать һәм сәүдә министры Равил Зарипов, Алабуга мунициаль районы башлыгы Геннадий Емельянов, Чалы мэры Васил Шәйхразиев, ТР Кече һәм урта эшкуарлыкны үстерү комитеты рәисе Ленар Якупов һәм башкалар озатып йөрде.

Алабугадан кунаклар Чаллыга юл тотты, алар биредә “КАМАЗ” ААҖ белән танышырга ниятли.