ТР җитәкчелеге Росстатка республика инициативаларына теләктәшлек күрсәткән өчен рәхмәтле

ТР җитәкчелеге Дәүләт статистикасы федераль хезмәтенә республиканың мәгълүмат җыю һәм эшкәртү процедураларын камилләштерү буенча инициативаларына теләктәшлек күрсәткән өчен рәхмәтле. Бүген Росстат җитәкчесе урынбасары Максим Дианов белән очрашуда ТР Премьер-министры Илдар Халиков шулай дип белдерде. ТР Хөкүмәте йортында узган очрашуда Татарстанстат җитәкчесе Валерий Кандилов та катнашты.

Илдар Халиков Росстат җитәкчесен ТР Президенты исеменнән сәламләп, республиканың һәрвакыт статистик учет өлкәсендә алга куйган бурычларны нәтиҗәле чишәргә омтылышын ассызыклады. ТР Хөкүмәте башлыгы Росстатка Татарстан җитәкчеләре инициативаларын хуплаганы өчен рәхмәт сүзләрен җиткерде.

“Җитди һәм якланган структура буларак, федераль хезмәт төбәкләрнең мәгълүматлаштыру, мәгълүматларны җыю һәм эшкәртү процедураларын гадиләштерүгә кагылышлы инициативаларын чикләми. Коллегаларыбызга, әлбәттә, өстәмә эш тудырабыз. Моны гомуми нагрузканы киметү өчен эшлибез”, - дип искәртте ул.

Илдар Халиков 2010 елда узган Бөтенроссия халык исәбен алуның Татарстан өчен әһәмиятен ассызыклады. “Узган халык санын алу барыбыз өчен дә гади булмады, шулай да без аны җитди проблемаларсыз үткәрә алдык. Татарстан кебек күпмилләтле халык яшәгән республикалар өчен сан алу мөһим. Безнең республика динамик үзгәрештә”, - дигән ышаныч белдерде Премьер-министр.

Илдар Халиков сүзләренә караганда, Росстат мәгълүматлары хезмәт ресрурслары белән дөрес идарә итү һәм дәүләт сәясәтен формалаштыру өчен кирәк. ТР Премьер-министры хәбәр иткәнчә, статистик мәгълүматлар нигезендә Татарстанда бүгенге көндә балалар бакчасы төзелешен күздә тоткан “Бәләкәч”, торак төзелеше белән бәйле проектлар гамәлгә ашырыла. Хөкүмәт башлыгы шәхси ярдәмче хуҗалыкларны исәпкә алуны да республика өчен бик мөһим дип атады.