Хельсинкида Финляндия белән Татарстан президентлары очрашты

Бүген очрашуда Финляндия Президенты Тарья Халонен белән Татарстан Республикасы Президенты Рөстәм Миңнеханов киләчәктә Россиянең динамик үсеш алучы төбәкләренең берсе буларак Татарстанның Финляндия белән мөнәсәбәтләрен үстерү мәсьәләләре буенча фикерләште.

Искәртеп үтәбез, ТР Президенты Рөстәм Миңнеханов җитәкчелегендәге Татарстан делегациясе Хельсинкида ике көнлек сәфәрдә. Сәфәрнең төп максаты – Финляндия белән Татарстан арасында сәүдә һәм икътисади хезмәттәшлекне үстерү.

Финляндия Президенты Тарья Халонен белән очрашу тәмамлангач Рөстәм Миңнеханов ММЧ вәкилләренә бүгенге визит Финляндия белән мөнәсәбәтләрне яңа дәрәҗәгә чыгарачак дип белдерде.

24-25 мартта Хельсинкида булу кысаларында икътисади хезмәттәшлек турында ниндидер килешүләр төзү турында сүз барганда, Татарстан Президенты бу юлы Финляндиягә Татарстан парламетнарийлары, бизнесменнары, дәүләт түрләләре делегациясе килүен билгеләп үтте.

“Безнең Финляндия белән мөнәсәбәтләрнең тарихы бар инде, - диде Рөстәм Миңнеханов. - Без бу илгә нефть-химия продукцияләре чыгарабыз. Биредә “Түбән Кама Нефтехим” ААҖ кебек эре сәнәгать предприятиесенең бу мәсьәлә белән шөгыльләнә торган сәүдә вәкиллеге бар. Бүген “Түбән Кама Нефтехим” продукциясен Финляндия предприятиеләренә җибәрү буенча берничә килешү төзеләчәк”.
Моннан тыш, иртәгә Финляндия белән Татарстан компанияләре катнашында уртак инновация проектларын гамәлгә ашыру турындагы килешүгә кул куелачак, дип белдерде ТР башлыгы.

Безнең төп бурыч – Татарстанда мөмкин кадәр күбрәк фин компанияләрен тәкъдим итү, дип белдерде ТР Президенты. Аның фикеренчә, бүгенге көндә Финляндия компанияләре югары технологияле һәм көндәшлелеккә сәләтле продукция җитештерә.

Без шулай ук чит ил компанияләре үсеше өчен Татарстан нинди мөмкинлекләргә ия булуын тәкъдим итәргә телибез, дип билгеләп үтте Рөстәм Миңнеханов.

Татарстан өчен Финляндиянең мәгариф өлкәсе зур кызыксыну уята, дип ассызыклады Татарстан башлыгы.

“Без мөнәсәбәтләрне бөтенләй яңа дәрәҗәгә күтәрәчәкбез, һәм Россия белән Финляндия мөнәсәбәтләрендә Татарстанның роле сизелерлек булачак”, - дип ассызыклады Рөстәм Миңнеханов.