Илдар Халиков сыйфат өчен ТР Хөкүмәте премияләрен тапшырды

Бүген ТР Министрлар Кабинетында ТР Хөкүмәтенең сыйфат премияләрен алуга уздырылган чираттагы бәйгегә тантаналы шартларда йомгак ясалды. 2010 ел бәйгесенең лауреат һәм дипломантларын Премьер-министр Илдар Халиков бүләкләде.

Татарстан Хөкүмәтенең сыйфат премияләрен алуга уздырылган бәйгенең бу инде алтынчысы иде. Үткән алты ел вакыт эчендә анда республиканың 423 предприятие-оешмасы катнашып, 21 е - лауреат, 53 е дипломант исемен яулаган. Шунысы игътибарга лаек: сыйфат бәйгесендә 44 предприятие үзен икешәр, 18 е - өчәр тапкыр сынап караган. Бәйге җиңүчеләре арасында “КАМАЗ-Металлургия”, “КАМАЗ-Дизель”, “Түбән Кама шин”, “Түбән Кама нефтехим”, “Казан оргсинтез”, “Казанкомпрессормаш”, “Чаллы-Бройлер” җәмгыятьләре, ТР буенча Эчке эшләр министрлыгының медицина-санитар часте һ.б. бар.

Бәяләү критерийларына Ауропаның сыйфат премиясе моделе салынган. Ул сыйфат менеджментының гомум принципларын – кулланучыга йөз тотуны, менеджмент сыйфатын, персонал җәлеп итүне, инновацияле эшчәнлек, партнерлыкны үстерү, нәтиҗәгә ориентлашуны һ.б. берләштерә. Бәйге, шул рәвешле, предприятие-оешмаларга максатчан үсешкә, эшчәнлекне камилләштерүгә һәм көндәшлек сәләтен күтәрүгә ярдәм итә. Премьер-министр Илдар Халиков белдергәнчә, сыйфат өлкәсендә ТР Хөкүмәте премиясе башкарылган эшкә югары бәя генә түгел, бизнесны камилләштерүгә, идарәнең нәтиҗәле стратегиясен төзүгә этәргеч тә. “Бу бәйгеләрнең ахыргы максаты кубоклар, дипломнар алу гына түгел. Шушы узган 6 ел эчендә республика җитәкчелеге тарафыннан сыйфат премиясе бәйгесенә махсус игътибар бирелде. Ул Татарстан алдындагы стратегик бурычларны хәл итүгә ярдәм итә. Үзебездә җитештерелгән товарларны Россия һәм чит илләр базарына чыгару,Татарстан товарларын таныту, аларның башка җитештерүчеләр арасында лаеклы урын алуы, уңай имиджын формалаштыру безнең өчен гаять мөһим. ТР Хөкүмәтенең сыйфат буенча премиясе “Татарстанның иң яхшы 100 товары” конкурсы белән бергә предприятиеләр белән идарә системасын, продукцияне актив рәвештә ил һәм чит ил базарларына этәрүне тагын да югарырак баскычка күтәрүне максат итә. Бу бәйгедә даими катнашучы република предприятие-оешмалары сыйфат буенча төбәкара, Бөтенроссия, халыкара бәйгеләрдә дә актив катнашып килә”,- дип ассызыклады Хөкүмәт башлыгы.

Сыйфат премиясен тапшыру буенча Совет рәисе урынбасары, ТР Сәнәгать һәм сәүдә министры Равил Зарипов шушы узган 6 ел эчендә бәйгедә 400 дән артык предприятие-оешманың гына катнашуын азрак саный. Аның белдерүенчә, алга таба предприятиеләрне популярлаштыру буенча эшнең нәтиҗәлелеген тагын да күтәрергә кирәк.

2010 елгы сыйфат премиясенә республиканың 16 шәһәр һәм районыннан 79 заявка алынган булган. Анда катнашкан 400 дән артык предприятие-оешманың бишесе, Совет карары белән лауреат исеменә лаек булган. Алар -“Түбән Кама нефтехим”, “КАМАЗ-Дизель” ААҖ, ТР буенча Эчке эшләр министрлыгының медицина-санитар часте, “ГКС” фәнни-җитештерү предприятиесе һәм “Республика медицина китапханә-мәгълүмат үзәге” дәүләт учреждениесе. 16 сы- дипломант исеменә лаек булган. Дипломнар белән бүләкләнүчеләр арасында “Түбән Кама шин” ААҖ, “КАМАЗавтотехника” ҖЧҖ, Төбәкара клиник-диагностика үзәге, “Татинвестгражданпроект” ДУП, Казан дәүләт энергетика униврситеты һ.б бар иде. 12 предприятие һәм оешма 2010 ел нәтиҗәләре буенча ТР Хөкүмәтенең сыйфат премияләрен бирү буенча Совет грамоталары белән бүләкләнде.

Илдар Халиков бу юлы катнашучылар спектрының киңәюенә, араларында хатын-кызлар җитәкчелек иткән предприятие-оешмалар саны артуга шатлануын белдереп, 2011 елгы бәйге тагын да нәтиҗәлерәк булыр, дигән өметтә калды һәм предприятие-оешмаларны анда актив катнашырга чакырды.