2011 елда Татарстанда балаларның җәйге ялы һәм мәшгульлегенә 1 миллиард сумнан артык акча юнәлдереләчәк

2011 елда Татарстанда балалар һәм яшьләрнең җәйге ялын, сәламәтлеген ныгытуны һәм мәшгульлеген оештыру программасын гамәлгә ашыруга 1,077 миллиард сум акча юнәлдереләчәк. Бүген Татарстан Республикасында балалар һәм яшьләрнең җәйге ялын, сәламәтлеген ныгытуны һәм мәшгульлеген оештыру буенча Республика ведомствоара комиссиясе утырышында әнә шундый мәгълүматлар китерелде. Утырыш видеоконференция режимында Татарстанның барлык муниципаль районнары катнашында ТР Хөкүмәте йортында узды, аны республика Хөкүмәте вице-премьеры Зилә Вәлиева үткәрде.

Утырышның башында З.Вәлиева билгеләп үткәнчә, 2011 елда Татарстанда балалар һәм яшьләрнең җәйге ялын, сәламәтлеген ныгытуны һәм мәшгульлеген оештыру программасын эшләү бер дә җиңелләрдән булмаган. Шуңа да карамастан, программа кабул ителгән, кызыксынган яклар белән килеп туган мәсьәләләр хакында фикер алышулар узган. “Бүген бу безгә программаны гамәлгә ашыруның сыйфатына бәйле мәсьәләләргә күбрәк тукталырга мөмкинлек бирә”, - дип белдерде ТР вице-премьеры.

ТР яшьләр эшләре, спорт һәм туристлык министры урынбасары Андрей Кондратьев үз докладында 2011 елгы җәйге кампаниянең төп параметрлары хакында хәбәр итте. Ул билгеләп үткәнчә, быелгы программада беренче тапкыр 2010 елда кулланылган балалар ялын оештырудагы барлык яңа алымнар исәпкә алынган. Мисал өчен, министр урынбасарының сүзләренә караганда, балалар һәм яшьләрнең ялын һәм мәшгульлеген оештыру өчен яңа территорияләр үзләштерелгән, балаларның яңа категорияләре колачлап алынган. Шифаханә-курорт учреждениеләрендә җәйге ялны оештыру тәҗрибәсе дә үзен аклаган.

Андрей Кондратьев хәбәр иткәнчә, программаның беренчел проекты 2010 елның декабрендә үк әзер булса да, азык-төлек продуктларына бәяләрнең артуы аркасында программаны эшләүчеләргә документка үзгәрешләр кертергә туры килгән. Лагерьда бер бала өчен көнлек туклану бәясе 180 сумнан 201 сумга кадәр арткан. Министр урынбасары билгеләп үткәнчә, программаны финанслау Татарстан Президенты Рөстәм Миңнехановның ярдәме нәтиҗәсендә арттырылган.

Нәтиҗәдә, 2011 елда Татарстанда балалар һәм яшьләрнең җәйге ялын, сәламәтлеген ныгытуны һәм мәшгульлеген оештыру программасын финанслау күләме 1,077 миллиард сум тәшкил итә. Татарстан Республикасы узган елга караганда 10 процентка артыграк акча бүлеп бирә, федераль бюджет финаслау күләмен 7,5 процентка арттырды.

2011 елда Татарстан балалары 121 стационар лагерьда, 75 палаткалы лагерьда, 1300 көндезге лагерьда, 10 шифаханә-курорт учреждениесендә ял итәчәк. А.Кондратьев билгеләп үткәнчә, республикада стационар лагерьларның саны елдан-ел арта бара. Мисал өчен, 2011 елда “Полянка” һәм “Волга” лагерьлары, шулай ук реконструкция ясалган ике лагерь үзләренең беренче сменаларын кабул итәчәк.
2011 елда стационар лагерьда сменаның уртача бәясе – 8658, палаткалы лагерьда – 3752, көндезге лагерьда – 1692, шифаханә-курорт учреждениесендә 16800 сум тәшкил итәчәк, Кара диңгез буендагы лагерьда ял итү 13800 сумга төшәчәк.

2011 елда 211 мең бала, яшүсмер һәм яшьләрнең җәйге ялын оештыру күздә тотыла. Андрей Кондратьевның сүзләренә караганда, бу сан узган елгы план күрсәткеченә туры килә.

Җәен 40 мең балигъ булмаган баланы вакытлыча эшкә урнаштыру ниятләнә.

2011 елда авыр шартларда яшәүче балаларга аерым игътибар биреләчәк – 17 меңнән артык баланың җәйге ялын оештыру күздә тотыла. Девиант тәртипле балалар өчен сменалар нормативы арттырылган – 2010 елда 600 кеше булса, быел 1000 гә җиткән. 2011 елда 14500 яшүсмергә (узган ел 4500 иде) хәрби-патриотик сменалар оештырылачак. Шулай ук, Андрей Кондратьевның сүзләренә караганда, республикада беренче тапкыр хезмәт һәм ял лагерьлары да оештыру ниятләнә - быел 8000 балага шундый сменалар каралган.

Андре Кондратьев сүзләренчә, быел балалар сәламәтләндерү лагерьларына юлламалар сатып алу тәртибен гадиләштерү күздә тотыла. Министр урынбасары хәбәр иткәнчә, ТР Министрлар Кабинетының тиешле карар проекты әзер инде.

ТР яшьләр эшләре, спорт һәм туристлык министры урынбасарының сүзләренә караганда, районнарның җәйге сәламәтләндерү кампаниясенә әзерлек актларын 25 майга кадәр имзалау ниятләнә.

ТР Хөкүмәте вице-премьеры Зилә Вәлиева балалар ялына даими мониторинг үткәрү кирәклеге турында белдерде. З.Вәлиеваның сүзләренә караганда, җәй дәвамында балалар лагерьларында сәламәтләндерү һәм тәрбия эшләренең ничек алып барылуын күзәтергә кирәк.