Май аенда Казанга Австрия Президенты җитәкчелегендәге зур делегация киләчәк

Май азагында Россиягә рәсми визиты кысаларында Казанга Австрия Президентының килүе көтелә. Дәрәҗәле кунак үзе белән Татарстанга эшмәкәрләр делегациясен дә алып киләчәк. ТР Президенты Рөстәм Миңнехановның Австриянең РФ дәге Гадәттән тыш һәм Тулы вәкәләтле илчесе Маргот Клестиль-Лёффлер белән очрашуында шул сәфәргә кагылышлы мәсьәләләр күтәрелде.

“Президентыбызның беренче тапкыр Татарстанга килүенә без бик шат”, -дип белдерде илче журналистлар белән әңгәмәдә.Аның ассызыклавынча, Австрия делегациясе составында 75 эре бизнес вәкиле булачак. Ул сәфәрнең максатын икътисади, бизнес өлкәләрендә ике арадагы хезмәттәшлекне үстерү, дип атады. “Татарстан белән Австриянең уртак бизнес проектларын эшләү дәвам итә. Сәфәргә кадәр үк инде аерым конкрет проектлар хакында фикер алыша алачакбыз”, - дип белдерде Маргот Клестиль-Лёффлер.

Очрашуда катнашкан ТР Президентының Тышкы элемтәләр департаменты директоры - Президентның халыкара мәсьәләләр буенча ярдәмчесе Искәндәр Мөфлиханов бүген Австрия белән Татарстанның уңышлы инвестиция хезмәттәшлеге үрнәге булган кайбер проектларга тукталып үтте. Мәсәлән, Биектау районының Коркачык бистәсендә Австриянең “Винербергер” компаниясенең кирпеч җитештерү буенча заводы эшли “КАМАЗ”да исә ZF Алмания-Австрия компаниясе белән берлектә уртак производство эшләп килә. Бүгенге көндә Татарстанда Австрия капиталы катнашында барлыгы 12 предприятие теркәлгән. Алар автомобиль сәнәгате, хисаплау техникасын ремонтлау, сыра җитештерү, консультацияләр бирү, күпләп сату өлкәләренә карый.