Рөстәм Миңнеханов нефть эшкәртү һәм нефть химиясе заводлары комплексының эше белән танышты

Бүген Татарстан Республикасы Президенты Рөстәм Миңнеханов Түбән Камада “ТАНЕКО” ААҖндә Нефть эшкәртү һәм нефть химиясе заводлары комплексының эше белән танышты.

Р.Миңнеханов иң элек комплексның сәнәгать мәйданчыгында висбрекинг җайланмасы белән танышты.

“Казан” җитештерү-төзелеш берләшмәсе” ҖЧҖ генераль директорының беренче урынбасары Марс Газизуллин ТР Президентына җайланмада эшләрнең агымдагы торышы хакында бәян итте. Хәзерге вакытта әлеге оешма белгечләре гидросынау эшләренә керешкән, технологик торба үткәргечләр, электр кабельләре, КИПиА кабелен монтажлау эшләре төгәлләнеп килә.

Марс Газизуллин Рөстәм Миңнехановка шулай ук күкерт җитештерү блогындагы вәзгыять хакында мәгълүмат бирде. Нефть эшкәртү һәм нефть химиясе заводлары комплексының әлеге мөһим технологик буыны нефть эшкәртү продуктларыннан күкертле водород һәм вакланган күкерт алу өчен хезмәт итә. Бүгенге көндә биредә торба үткәргечләрне монтажлау һәм кабельләр сузу эшләре алып барыла. Объектта 700 дән артык кеше хезмәт куя.

Алга таба Рөстәм Миңнеханов Нефть эшкәртү һәм нефть химиясе заводлары комплексының чистарту корылмалары белән танышты. Объекттагы агымдагы эшләр хакында “ИНВЭНТ” идарә компаниясе” ҖЧҖ генераль директоры Эльбек Сафаев бәян итте. “ТАНЕКО” чистарту корылмаларының проект куәте елына 12,4 миллион кубометр тәшкил итә.

Шуннан соң Рөстәм Миңнеханов Нефть эшкәртү һәм нефть химиясе заводлары комплексын төзү буенча республика штабы эшендә катнашты. Төп доклад белән “ТАНЕКО” ААҖ генераль директоры Хәмзә Баһманов чыгыш ясады. Ул, аерым алганда, нефтьне кабул итү, эшкәртү, саклау, транспортлау һәм төяп җибәрүне дә кертеп, барлык система җиһазларын комплекслы сынау эшләре башкарылуы хакында бәян итте. Мәйданчыкка 131 мең тоннадан артык чимал кабул ителгән. 9 мең тоннадан артык тотрыклы нафта, 10 мең тоннадан артык көнкүреш мич ягулыгы, 70 мең тоннадан артык технологик экспорт ягулыгы эшләп чыгарылган. Хәмзә Баһманов шулай ук төп подряд оешмалары алдында торган беренче чиратта хәл ителергә тиешле бурычларны билгеләде, башкарма техник документларны тапшыру буенча тагын да оперативрак эшләргә кирәклеген искәртте.

Башкарылган эшләр турында хисап белән шулай ук «Нефтегазинжиниринг» ҖЧҖ, “Казан” җитештерү-төзелеш берләшмәсе” ҖЧҖ, «Камгэсэнергострой» ААҖ, «Татстрой» ААҖ, «ИНВЭНТ» идарә компаниясе” ҖЧҖ җитәкчеләре чыгыш ясады.

Утырыш ахырында Рөстәм Миңнеханов биремнәрнең активрак үтәлүен таләп итте, бүгенге көндә моның өчен барлык шартлар да тудырылуын ассызыклады. Ул шулай ук подряд оешмалары җитәкчеләренең шәхси җаваплылыгына басым ясады.