«КАМАЗ» һәм «Бошунг Холдинг» коммуналь техника җитештерү буенча уртак предприятие төзиячәк

Бүген Татарстан Президенты Рөстәм Миңнеханов «Бошунг Холдинг» компаниясе җитәкчелеге белән очрашты.
Татарстан Республикасы Хөкүмәте йортында узган очрашуда «Бошунг Холдинг» (Швейцария) Директорлар советы әгъзасы Марсель Бошунг, ТР Премьер-министры Илдар Халиков, ТР транспорт һәм юл хуҗалыгы министры Ленар Сафин, ТР финанс министры Радик Гайзатуллин, Казан мэры Илсур Метшин, “КАМАЗ” ААҖ генераль директоры Сергей Когогин һәм башкалар катнашты.
Искәртеп узабыз, коммуналь техника җитештерүче «Бошунг Холдинг» компаниясенең 60 елдан артык тарихы бар. Компаниянең штаб фатиры Швейцариядә урнашкан.
Рөстәм Миңнеханов «Бошунг Холдинг» компаниясе җитәкчелеге белән очрашу барышында Татарстан вәкилләре өчен визит оештырган һәм «Бошунг Холдинг» техникасы модельләре белән танышу мөмкинлеге тудырган өчен рәхмәт белдерде. Ул Казан һәм Россиянең башка шәһәрләре ихтыяҗлары өчен коммуналь техника җитештерү буенча «Бошунг Холдинг» компаниясе һәм “КАМАЗ” ААҖнең уртак планнарын уңай бәяләде.
Әлеге компания эшләп чыгара торган продукция зур игътибарга лаек, бу заманча югары җитештерүчән техника, дип билгеләп үтте ул. Рөстәм Миңнеханов хәбәр иткәнчә, алга таба эшләү һәм техниканы куллану өчен матди-техник база әзерләргә, техникага сервис хезмәте күрсәтүне җайга салырга кирәк.
«Бошунг Холдинг» техникасын эшләп чыгаруны иң эре предприятиеләрнең берсе булган “КАМАЗ” ААҖ базасында локальләштерү турындагы килешү – уңышлы уртак проект гарантиясе, - диде Рөстәм Миңнеханов. – Моннан тыш, бу продукциянең үзкыйммәтен киметергә мөмкинлек бирәчәк”.
Марсель Бошунг, үз чиратында, “КАМАЗ” ААҖ белән хезмәттәшлекнең нәтиҗәле һәм уңышлы булачагына ышаныч белдерде. Ул билгеләп үткәнчә, компания “Бошунг” машиналарында өзлексез эшләү өчен белгечләрне өйрәтү белән шөгыльләнәчәк.
Сергей Когогин очрашу барышында хәбәр иткәнчә, бүгенге көндә “КАМАЗ” ААҖ территориясендә “Бошунг Холдинг” катнашындагы проект өчен җитештерү мәйданчыклары әзерләнә. Аның сүзләренә караганда, “КАМАЗ” ААҖ җитештерүне локальләштерүгә бәйле мәсьәләләрне үз өстенә алырга әзер, бу инвестиция чыгымнарын киметергә мөмкинлек бирәчәк. Алга таба “КАМАЗ” ААҖ Россиянең климат шартлары нигезендә «Бошунг Холдинг» техникасын камилләштерер дип көтелә.
Казан мэры Илсур Метшин билгеләп үткәнчә, бүгенге көндә техникага хезмәт күрсәтү өчен кадрлар әзерләү мәсьәләләре җентекләп өйрәнелгән, «Бошунг Холдинг» компаниясе шәһәргә кар көрәү технологиясенең вариантларын тәкъдим иткән.
Очрашу ахырында ике документка кул куелды.
Аерым алганда, Казан шәһәре башкарма комитеты, “КАМАЗ” ААҖ һәм «Бошунг Холдинг АГ» компаниясе арасында ниятләр турындагы өч яклы килешү имзаланды. Документка Казан башкарма комитеты җитәкчесе Алексей Песошин, “КАМАЗ” ААҖ генераль директоры Сергей Когогин һәм «Бошунг Холдинг» Директорлар советы әгъзасы Марсель Бошунг кул куйды.
КАМАЗ” ААҖ генераль директоры Сергей Когогин һәм «Бошунг Холдинг» Директорлар советы әгъзасы Марсель Бошунг “КАМАЗ” ААҖ һәм «Бошунг Холдинг» компаниясе арасында уртак предприятие төзү турындагы килешүне имзалады.