Рөстәм Миңнеханов БМО Генераль секретаренең спорт буенча киңәшчесе белән очрашты

Бүген Татарстан Республикасы башлыгы Рөстәм Миңнеханов Берләшкән милләтләр берлеге Генераль секретаренең спорт буенча киңәшчесе Вилфрид Лемке белән очрашты.

Очрашу Казан Кремлендә ТР Президенты резиденциясендә узды.

Рөстәм Миңнеханов Лемке әфәндегә Татарстан башкаласына визиты өчен рәхмәт белдерде. Яклар республиканың 2013 елгы Бөтендөнья җәйге Универсиаданы, халыкара дәрәҗәдәге башка спорт чараларын үткәрүгә әзерлек мәсьәләләре буенча фикерләште.

Рөстәм Миңнеханов сүзләренә караганда, бүген Татарстан спортны үстерүгә җитди игътибар бирә торган төбәк булып тора. Шулай итеп, 2013 елгы Универсиададан тыш, Татарстан 2018 елда футбол буенча дөнья чемпионаты кысаларында матчлар кабул итәргә әзерләнә, дип искәртте ул.

Моннан тыш, Татарстан Россия Федерациясе төбәге буларак, 2015–2017 елларда спортның су төрләре буенча дөнья чемпионаты үткәрүгә заявка биргән. “Бу юнәлештә эшләрне көчәйтергә кирәк, - диде ТР Президенты. – Бу ярышларны үткәрү хокукы алу өчен мөмкинлекләр бар, дип саныйм”.

Очрашуда шулай ук Казан мэры Илсур Метшин, ТР яшьләр эшләре, спорт һәм туристлык министры Рафис Борһанов, ТР Президенты аппаратының тышкы элемтәләр департаменты директоры – ТР Президентның халыкара мәсьәләләр буенча ярләмчесе Искәндәр Мөфлиханов катнашты.