Татарстан Президенты Рөстәм Миңнеханов: Татарстан һәм Новосибирск өлкәсе хезмәттәшлек итәргә тели

Бүген ТР Министрлар Кабинетында Татарстан Республикасы һәм Новосибирски өлкәсе арасында сәүдә-икътисади, фәнни-техник, социаль һәм мәдәни хезмәттәшлек турындагы килешүгә кул куелды. Шулай ук Россия Фәннәр академиясе Себер бүлегенең Г.К.Боресков исемендәге Катализ институты һәм «Татнефтехиминвест-холдинг» ААҖ арасында фәнни-техник хезмәттәшлек турында килешү имзаланды.
Килешүләргә Татарстан Президенты Рөстәм Миңнехановның Новосибирски өлкәсе губернаторы Василий Юрченко белән очрашуы кысаларында кул куелды.
Рөстәм Миңнеханов очрашу барышында билгеләп үткәнчә, Новосибирски өлкәсе Россия Федерациясенең куәтле фәнни һәм белем бирү үзәкләре булган иң нык үсеш алган идустриаль төбәкләренең берсе. Татарстан Новосибирски өлкәсе белән хезмәттәшлек итүгә карата кызыксыну белдерә һәм имзаланган килешү элемтәләрне яңа дәрәҗәгә күтәрәчәк.
“Безнең потенциал конкрет проектларга әверелергә тиеш. Хакимиятнең бурычы – бизнес һәм фәннең безнең төбәкләрдә үсеш кичерүе өчен тиешле шартлар тудыру”, - дип саный ул.
Республика башлыгы белдергәнчә, Татарстанда төзелгән ИТ-парк һәм федераль электрон сәүдә мәйданчыгының потенциалы Новосибирски өлкәсе тарафыннан файдаланылырга мөмкин.
ТР Президенты Новосибирски өлкәсендәге татар диаспорасына ярдәм күрсәткәне өчен губернаторга рәхмәт белдерде һәм бу җәйдә республика делегациясенең Новосибирскидагы Сабантуйда кунак буларак катнашачагын вәгъдә итте.
Василий Юрченко Новосибирски өлкәсе һәм Татарстанның һәрвакытта да билгеләнгән килешүләрне үтәүләрен һәм моның зур әһәмияткә ия булуын билгеләп үтте. Төбәкләр арасындагы элемтәләрнең тәҗрибә алмашу өчен файдасы зур, диде ул.
“Казанда 6 ел булганым юк иде инде. Бу вакыт эчендә күп кенә яңа объектлар сафка баскан, шәһәр бик нык үзгәргән. Без күп кенә проектларны сездән алып үзебездә гамәлгә ашырачакбыз”, - дип белдерде губернатор.
Аерым алганда, ул билгеләп үткәнчә, Новосибирски өлкәсендә электрон документлар әйләнеше һәм “Электрон Хөкүмәт” проектлары гамәлгә кертеләчәк. Россиянең иң уңышлы эшләүче ике технопаркы Новосибирски өлкәсе һәм Татарстанда урнашкан. Аларның потенциалын ике якка да файдалы шартларда файдаланырга мөмкин.
Василий Юрченко Новосибирски өлкәсе делегациясен җылы кабул иткәннәре һәм бай эчтәлекле программа өчен Татарстан Президентына рәхмәт белдерде.