ЯҢАЛЫКЛАР

Бүген Казанда “Россия Федерациясендә дару бәяләрен көйләү” исемле Бөтенроссия киңәшмәсе ачылды. Беренче утырышта Татарстан Премьер-министры Рөстәм Миңнеханов катнашты.
Республика Премьер-министры Тарифлар буенча федераль хезмәт җитәкчесе Сергей Новиковка мондый зур киңәшмә үткәрүне Татарстан башкаласына ышанып тапшыруы өчен рәхмәт белдерде. Рөстәм Миңнеханов киңәшмәдә катнашучыларның дару бәяләрен көйләүне яхшырту өчен кирәк булган механизмнарны уйлап таба алачагына ышаныч белдерде. “Бу бик катлаулы мәсьәлә, монда чамадан уздырып җибәрергә ярамый. Бәяләрне көйләүнең дөрес механизмын табарга кирәк”, - дип ассызыклап үтте Татарстанның хөкүмәт башлыгы.

Бүген Татарстан Республикасының Хөкүмәт йортында Татарстан Республикасы Хөкүмәте һәм “Евроцемент групп” ЯАҖ арасында хезмәттәшлек итү турындагы Килешүгә кул куелды.
Документка Татарстан Республикасы Премьер-министры Рөстәм Миңнеханов һәм “Евроцемент групп” ЯАҖ президенты Михаил Скороход кул куйды.

2009 елда Татарстан Республикасы мәктәпләренә 39 мең беренче сыйныф укучысы барачак. Бүген Татарстан Республикасы Министрлар Кабинетында узган брифингта бу турыда Татарстан Республикасының мәгариф һәм фән министры урынбасары Айрат Зиннуров әйтте.
Брифинг гомуми белем бирү учреждениеләрен яңа уку елына әзерләүгә багышланган иде һәм ул, гадәттәгечә, республиканың барлык муниципаль районнарын тоташтырып, видеоконференцэлемтә режимында узды.

“Миңа Татарстан Республикасында Электрон Хөкүмәт өлкәсендәге проектларның зур теләк белән тормышка ашырылуы һәм гражданнарга, оешмаларга мәгълүмати-коммуникацион технологияләр кулланып хезмәт күрсәтү буенча башкарма хакимиятнең федераль органнары эшчәнлеге ошады”. Бүген Казанда күчмә киңәшмә тәмамланганнан соң журналистларның сорауларына җавап биреп, Россия Хөкүмәте вице-премьеры – Россия Хөкүмәт аппараты җитәкчесе Сергей Собянин шулай диде.

Бүген Татарстан Республикасы Хөкүмәт йортында Татарстан Республикасы Министрлар Кабинеты һәм Дәүләти теркәү, кадастр һәм картография федераль хезмәте арасында кадастр мөнәсәбәтләре, күчемсез милеккә булган хокукларны дәүләти теркәү һәм шуңа бәйле эшләрне башкару өлкәсендә дәүләт хезмәтен электрон рәвештә “бер тәрәзә” режимында күрсәтү мәсьәләсе буенча хезмәттәшлек итү турындагы килешүгә кул куелды.
Документка Татарстан Премьер-министры Рөстәм Миңнеханов һәм Дәүләти теркәү, кадастр һәм картография федераль хезмәте җитәкчесе Сергей Васильев кул куйды.

Халыкка дәүләт хезмәте күрсәтү процедурасын электрон рәвешкә күчерү бүгенге көндә Россиядә өстенлекле проектларның берсе булып тора. Бүген Казанда узган күчмә киңәшмәдә бу турыда Россия Хөкүмәте вице-премьеры – Россия Хөкүмәт аппараты җитәкчесе Сергей Собянин әйтте.
Шуны искәртик: Сергей Собянин Казанга эш визиты белән килгән. Визитның төп максаты – “Электрон Хөкүмәт элементларын булдыруда Татарстан тәҗрибәсе, гражданнар һәм оешмаларга мәгълүмати-коммуникацион технологияләр кулланып хезмәт күрсәтү буенча башкарма хакимиятнең федераль органнары эшчәнлеге турында” дигән темага киңәшмә үткәрү.

Бүген Татарстан башкаласына эш визиты кысаларында Россия Хөкүмәте рәисенең урынбасары – Россия Хөкүмәт аппараты җитәкчесе Сергей Собянин кайбер объектларны карап чыкты.
Шуны искәртик: Сергей Собянин һәм аны озатып йөрүче кешеләр бүген иртән “Казан” халыкара аэропортына килеп җиттеләр. Кунакларны Татарстан Президенты Минтимер Шәймиев, Татарстан Премьер-министры Рөстәм Миңнеханов һәм башка рәсми затлар каршы алды.

Бүген, 24 нче августта, Татарстан башкаласы Казанда “Электрон Хөкүмәт элементларын булдыруда Татарстан тәҗрибәсе, гражданнар һәм оешмаларга мәгълүмати-коммуникацион технологияләр кулланып хезмәт күрсәтү буенча башкарма хакимиятнең федераль органнары эшчәнлеге турында” дигән темага күчмә киңәшмә булачак.
Киңәшмәне Россия Хөкүмәте рәисенең урынбасары – Россия Хөкүмәт аппараты җитәкчесе Сергей Собянин үткәрәчәк. Ул Казанга эш визиты белән килә.

2009 елның калган дүрт аенда Татарстан Республикасына якынча 650 мең кв. метр торакны төзелешкә кертергә кирәк. Бүген Татарстан Республикасы Министрлар Кабинетында узган киңәшмәдә бу турыда республикабыз Премьер-министры Рөстәм Миңнеханов әйтте.
Киңәшмә торакны файдалануга тапшыру мәсьәләләренә багышланган иде һәм ул, Татарстанның барлык муниципаль районнарын тоташтырып, видеоконференцэлемтә режимында узды.

Бүген Татарстан башкаласына ике көнлек эш визиты белән Россия Федерациясенең эчке эшләр министры, армия генералы Рәшит Нургалиев һәм Таҗикстанның эчке эшләр министры, милиция генерал-лейтенанты Абдурахим Кахаров килде.
“Казан” халыкара аэропортында кунакларны Татарстан Республикасы Премьер-министры Рөстәм Миңнеханов, Татарстан Республикасының эчке эшләр министры Әсгать Сәфәров, Татарстан Республикасының баш федераль инспекторы Марсель Галимәрдәнов каршы алды.