Татарстанда җылылык сезонына әзерлек 90% тәшкил итә

Татарстанның алдагы җылыту сезонына әзерлеге уртача 90 процент тәшкил итә. 5 сентябрь белешмәсе буенча, 2011-2012 җылыту сезонына үзәкләштереп җылыту системаларының 84 процентында опрессовка үткәрелгән, 79 процентыннан әзерлек паспортлары кабул ителгән, ләкин болар планда каралганнан бераз түбән. Социаль өлкә объектларының хәстәрлеге, әйтик, мәгариф өлкәсенеке 95 процент тәшкил итә, сәламәтлек саклауныкы – 96 процент, мәдәниятнеке – 93 процент һ.б. Инженерлык системалары һәм җиһазлары карап-тикшерелеп, әзерлеге түбәндәгечә бәяләнгән: котельныйлар – 94 процент, җылылык челтәрләре – 92 процент, су туплагычлар – 95 процент, су үткәргечләр – 98 процент.

Бүген ТР Министрлар Кабинетында республиканың үзәк мәгълүмат чаралары журналистларын җыеп, ТР төзелеш, архитектура һәм торак-коммуналь хуҗалык министры урынбасары Равил Кәримов шул хакта игълан итте.

Республика муниципаль берәмлекләре белән берлектә видеоконференция рәвешендә барган брифингта ТР Энергетика министрлыгының энергетика идарәсе башлыгы Гүзәл Садриева, республикада үзәкләштерелгән энергетика системасы өчен җаваплы “Генерирующая компания”, “Сетевая компания” һәм “СО ЕЭС” ачык акционерлык җәмгыятьләре җитәкчелеге вәкилләре дә катнашты.