И.Халиков: “Социаль иминият фонды эшчәнлегенең нәтиҗәсе – дәүләт яклавы астында булуларына ышанган кешеләрнең елмаюлы йөзләре”

Бүген Казанда Россия Федерациясе Социаль иминият фонды оешуга 20 ел тулуга багышланган тантаналы очрашу узды.

“Дәүләт органнары өчен бу бик күп вакыт та түгел, әмма Россия өчен әлеге этап зур үзгәрешләр, кризис чорына туры килде”, - дип ассызыклады тантанада катнашкан ТР Премьер-министры Илдар Халиков.

Ул моннан 20 ел элек Татарстан Республикасы социаль иминият системасын формалаштыручыларны рәхмәт сүзләре белән искә алды.

“Иң мөһиме, бу елларда фикердәшләрнең югары әзерлекле командасы оешты, алар бүгенге көндә төбәк бүлеге филиалларында хезмәт куя. Сезнең эшчәнлекнең нәтиҗәсе - дәүләт яклавы астында булуларына ышанган кешеләрнең елмаюлы йөзләре”, - диде Илдар Халиков.

Ул шулай ук РФ Социаль иминият фондының ТР буенча төбәк бүлеге хезмәткәрләренә ТР Министрлар Кабинетының Рәхмәт хатларын тапшырды.

“Бүгенге көндә Фондның Татарстан Республикасы буенча төбәк бүлегендә 118 меңнән артык иминиятләштерүче теркәлгән. Бу – төрле милек формасындагы предприятиеләр, оешмалар һәм учреждениеләр. Алар 1,5 миллионнан артык гражданны берләштерә”, - диде төбәк бүлеге идарәчесе Рамил Гайзатуллин.

Төбәк бүлеге бер елда эшкә сәләтсезлек кәгазьләре буенча түләүләргә генә дә 4 миллиард сумга якын акча сарыф итә.

Искәртеп узабыз, Социаль иминият фонды 1991 елның 1 гыйнварында оеша. Фонд акчалары дәүләт бюджеты составына кертелми һәм иминият тарифы хисабына формалаштырыла, бу исә иминият принципларына күчү өчен реаль мөмкинлекләр ача.