ТР Министрлар Кабинетында узган брифингта язгы ташуны авариясез уздыруны тәэмин итү турында сөйләделәр

Хәзерге вакытта Куйбышев сусаклагычында су күләме нормадан 3,5-4 метрга артык. Бу хакта Татарстан Министрлар Кабинетында брифингта Татарстан Гидрометеоүзәге башлыгы Феликс Гоголь хәбәр итте.

Брифинг 2018 елгы язгы ташуны авариясез уздыруны тәэмин итүгә багышланган иде.

 “Куйбышев сусаклагычында су тулган. Шуңа күрә, ташуның кызган чорында аңа коючы елгаларда су басу күзәтелергә мөмкин. Беренче чиратта, бу Сумка, Зөя, Казансу, Мишә, Нократ, Чишмә, Зәй елгалары. Язгы ташу характеры язгы процессларга, кар эрү ничек баруына бәйле булачак”, - дип белдерде Феликс Гоголь.

“Бу вакытка бу кадәр үк су күләме күзәтелгәне юк иде. Бездән югарырак һәм бездән түбәнрәк булган сусаклагычларда су торышы тынычланырга ирек бирми. Бездә берникадәр борчу бар, әмма барысы да контрольдә. Без Куйбышев сусаклагычына якынрак түбән территорияләрдә су басу мөмкин дип фаразлыйбыз”, - дип белдерде Татарстан Республикасының Гражданнар оборонасы һәм гадәттән тыш хәлләр министры урынбасары Николай Суржко. Аның сүзләренчә, су басу куркынычы Победилово, Отары, Васильево бистәләренә яный.

Киләсе атнада Татарстанда дүрт боз кичүен ябарга җыеналар. Бу хакта Татарстан Республикасының кечкенә көймәләр буенча баш дәүләт инспекторы Юрий Венедиктов хәбәр итте.

Юрий Венедиктов Иделдә – М7 автомобиль күпере һәм Яшел Үзәндә тимер юл күпере янында ике ерганак пәйда булганын хәбәр итте. Ерганаклар барлыкка килсә дә, халык елгада балык тотуын дәвам итүен билгеләп узды. Моңа бәйле рәвештә, ул күпләп балык тоту буенча 88 урынны контрольдә тоту бурычы куелуын әйтте.