Татарстанда 2017 елда финанс базарында катнашучылар эшчәнлеге нәтиҗәләре хакында фикер алыштылар һәм агымдагы елга бурычлар билгеләделәр
Татарстанда 2017 елда финанс базарында катнашучылар эшчәнлеге нәтиҗәләре һәм 2018 елга бурычлар турында Россия банкының ТР буенча Милли банк бүлегендә киңәшмә узды.
Киңәшмәдә ТР Премьер-министры Алексей Песошин, Россия банкының Идел-Вятка баш идарәсе башлыгы урынбасары Кирилл Коваленко, Татарстан Республикасы буенча Милли банк бүлеге идарәчесе Марат Шәрифуллин һәм финанс оешмалары вәкилләре катнашты.
Узган ел предприятиеләргә һәм халыкка кредитлар бирүнең күләме 2,3 трлн сумга кадәр арткан.
2017 елда республика халкына 29%ка артыграк заем акчалары бирелгән. Ипотека кредитлары югары темплар белән үскән, 2017 елда 37%ка арткан.
Киңәшмә барышында билгеләнгәнчә, кыйммәтле бурыч кәгазьләре чыгару ярдәмендә инвестицияләр җәлеп итү хәзергә аз таралган. Моңа бәйле рәвештә инвестицион активлыкны арттыруның мөһим юнәлеше булып корпоратив облигацияләр базарын үстерү тора.
Алексей Песошин Казанда 2018 елгы футбол буенча ДЧ уздырганда куркынычсыз һәм өзлексез исәп-хисап белән тәэмин итү кирәклегенә игътибарны юнәлтте.
Очрашу кысаларында шулай ук законсыз финанс операцияләренә каршы көрәш мәсьәләләре хауында да фикер алыштылар. Татарстан прокуроры урынбасары Марат Долгов киңәшмәдә катнашучыларга Татарстан Республикасы территориясендә законсыз уздырыла торган финанс агымнарын бетерү буенча чаралар турында мәгълүмат бирде.