Алексей Песошин ТР Дәүләт Советы утырышында катнаша
Бүген иртәнге сәгать унда бишенче чакырылыш Татарстан Республикасы Дәүләт Советының 37 нче утырышы ачылды.
Сессия эшендә Татарстан Республикасы Премьер-министры Алексей Песошин, ТР Хөкүмәте әгъзалары һәм чакырылганнар катнаша.
Утырышны ТР Дәүләт Советы рәисе Фәрит Мөхәммәтшин алып бара.
37 нче утырыш көн тәртибенә 41 мәсьәлә кертелгән, шул исәптә 13 республика законнары проектлары, 23 федераль законнар проектлары һәм Ленинград өлкәсе закон чыгаручылары тәкъдиме.
Бүген беренче укылышта сигез закон проекты каралачак. Алар арасында - Җир һәм Экология кодексына үзгәрешләр кертеләчәк закон проектлары, шулай ук Татарстан Республикасында җәмәгать тәртибен саклауда гражданнарның катнашуы турында, янгын куркынычсызлыгы турында республика законнарының аерым статьяларына үзгәрешләр кертү, Татарстан Республикасының монопрофильле муниципаль берәмлекләре территорияләрендә төзелгән социаль-икътисадый үсеше алдан билгеләнә торган территорияләр резидентлары өчен оешмалар табышына салым буенча салым ставкасын билгеләү турында, яшәү минимумының күләмен билгеләү тәртибе турында, Татарстан Республикасында мәдәни мирас объектлары турында закон проектлары бар.
Биш закон проекты икенче укылышта карау өчен әзерләнгән. Бу закон проектлары республиканың Сайлау кодексына һәм гражданнар мөрәҗәгатьләре турында, шәһәр төзелеше эшчәнлеге турында, торак төзелешен үстерүгә дәүләт ярдәме турында республика законнарына үзгәрешләр кертә.
Утырышта депутатлар Табигатьтән файдалану өлкәсендә федераль күзәтчелек хезмәтенең эшчәнлеге турында мәгълүмат тыңлаячаклар. Моннан тыш, көн тәртибенә парламентның Дәүләт корылышы һәм җирле үзидарә комитеты отчеты кертелгән.
ТР Дәүләт Советы дүрт Татарстан Республикасы җәмәгать судьялары кандидатурасын караячак.
Депутат Ринат Закиров парламент каравына Россия Федерациясе Федераль Собраниесе Дәүләт Думасы рәисе В.В. Володинга "Мәгариф
турында"федераль законга үзгәрешләр кертү турында" 438863-7 номерлы федераль закон проекты буенча Татарстан Республикасы Дәүләт Советы Мөрәҗәгатен кабул итү турында тәкъдим белән чыкты. Депутатлар бу сорауны бүген булып караячаклар.
Парламентның профиль комитетлары рәисләре Шакир Яһүдин, Альберт Хәбибуллин һәм Светлана Захаров өстәмә тәкъдимнәр белән чыктылар.