Рөстәм Миңнеханов: "Урман селекция-орлыкчылык үзәге - урман хуҗалыгын заманчалаштыруның ачык мисалы"

Бүген Саба муниципаль районының Лесхоз бистәсендә ТР Урман селекция-орлыкчылык үзәге ачылды.

Аны ачу тантанасында Татарстан Президенты Рөстәм Миңнеханов, Федераль урман хуҗалыгы агентлыгы җитәкчесе Виктор Масляков, РФ Федераль Җыены Федерация Советы әгъзасы Ралиф Сафин, ТР урман хуҗалыгы министры Наил Мәһдиев, “ВСС АВ” компаниясенең (Швеция) сатулар буенча җитәкчесе Андреас Бернер катнашты.

Мактаулы кунаклар республика Урман селекция-орлыкчылык үзәге белән танышты.

Аннары үзәк тантаналы төстә ачылды. Беренчеләрдән булып Федераль урман хуҗалыгы агентлыгы җитәкчесе Виктор Масляков чыгыш ясады. “Бүген Татарстан һәм Россиядә яңа үсентеләр белән урман мәйданнарын саклау мөмкинлеге туды. Моннан тыш, үзәк коллегаларга әлеге өлкәдәге яңа алымнарны үзләштерү мөмкинлеген бирә”, - дип ассызыклады ул. Аның сүзләренә караганда, үзәк, нигездә, республика акчасына төзелгән.

“Бу сез киләчәккә ышанасыз, киләчәк белән, алдагы буыннар һәм Россиянең киләчәге хакына яшисез дигән сүз”, - диде В.Масляков һәм Саба урманчылыгы җитәкчелегенә телевизор бүләк итте.

“Без илебезне модернизацияләү хакында күп сөйлибез. Мин бу урман хуҗалыгын яңартуда уңай үрнәк дип саныйм. Без Татарстанда дөнья дәрәҗәсендәге яңа алымнарны күрәбез”, - дип ассызыклады ТР Президенты Рөстәм Миңнеханов.

“Безгә мондый үзәк бик тә кирәк иде. Бу Татарстанның урман хуҗалыгын үстерүдә җитди этәргеч булачак, безнең бурыч - әлеге үзәкнең барлык мөмкинлекләреннән нәтиҗәле файдалану”, - диде республика башлыгы һәм җирле урман хуҗалыгы вәкилләренә интерактив такта бүләк итте.

РФ Федераль Җыены Федерация Советы әгъзасы Ралиф Сафин тантанада катнашучыларны шатлыклы вакыйга белән котлап, урманчыларга автобус һәм йөк машинасы тапшырды.

“ВСС АВ” компаниясенең сатулар буенча җитәкчесе Андреас Бернер журналистларга биргән интервьюсында бүген Татарстанда Россиядә шундый масштабтагы беренче питомник ачылуы хакында белдерде.

“Әлеге питомник күләме һәм автоматлаштыру дәрәҗәсе буенча уникаль. Без бу әле эшнең башы гына дип уйлыйбыз, чөнки Россиядә үсентеләргә ихтыяҗ зур. Питомникның җитештерүчәнлеге елына 12 миллион үсенте тәшкил итә”, - дип хәбәр итте А.Бернер.