Татарстан Президенты Курчак театрында, Республика клиник хастаханәсендә һәм Республика балалар клиник хастаханәсендә булды

Бүген Татарстан Президенты Рөстәм Миңнеханов Казанда киң колачлы төзелеш һәм реконструкция проектларын гамәлгә ашыруның барышы белән танышты. Республика башлыгы төзелеш эшләре алып барыла торган “Әкият” курчак театрында, шулай ук реконструкция эшләре җәелдерелгән Республика клиник хастаханәсендә һәм Республика балалар клиник хастаханәсендә булды.

Курчак театрында (биредә төзелеш эшләре инде ахырына якынлашып килә) Рөстәм Миңнеханов иҗат коллективлары шөгыльләнәчәк залларны һәм бүлмәләрне, шулай ук кафе урнашачак бүлмәне карады. Кайбер бүлмәләрдә әле эчке бизәкләү эшләре дәвам итсә дә, күбесендә бу эш төгәлләнгән инде. Шуңа бәйле рәвештә Р.Миңнеханов әзер бүлмәләргә иҗат коллективларын һәм балалар иҗаты түгәрәкләрен урнаштырырга кушты. Татарстан башлыгы кафега мөнәсәбәттә дә шундый күрсәтмә бирде. “Һәр объект эшләргә тиеш”, - дип мөрәҗәгать итте Татарстан Президенты Казан мэры Илсур Метшинга һәм ТР мәдәният министры Айрат Сибагатуллинга.

Рөстәм Миңнеханов Республика клиник хастаханәсендә сәламәтлек саклау өлкәсен модернизацияләү программасы кысаларында республиканың иң зур медицина учреждениесендәге капиталь ремонт һәм реконструкция эшләренең барышы белән танышты. Татарстан Президенты яңа кабул итү-диагностика бүлеген, хастаханәнең төп корпусының ремонтланган бүлмәләрен карады, шулай ук перинаталь үзәккә һәм поликлиникага керде, анда пациентлар белән аралашты.

Республика балалар клиник хастаханәсендә капиталь ремонт эшләре план буенча 2012 ел ахырында төгәлләнергә тиеш. Рөстәм Миңнеханов хастаханә белән танышу барышында нәни пациентлар өчен уңайсызлыкларны киметү һәм аларга капиталь ремонт эшләре үткәрелгән хастаханәдә югары сыйфатлы медицина ярдәмен мөмкин булганча тизрәк күрсәтү өчен эшләрне тизләтергә күрсәтмә бирде.