Казанда “Яңа Тура” технополисын төзү” проектын гамәлгә ашыру буенча ниятләр турындагы меморандумга кул куелды

Бүген ТР Хөкүмәте йортында “Яңа Тура” технополисын төзү” инвестицион проектын гамәлгә ашыру буенча ниятләр турындагы меморандумга кул куелды. Чарада Татарстан Президенты Рөстәм Миңнеханов катнашты.

Татарстан ягыннан меморандумга ТР икътисад министры Мидхәт Шаһиәхмәтов, Казан башкарма комитеты җитәкчесе Алексей Песошин, Яшел Үзән муниципаль районы башлыгы Сергей Батин, инвестор ягыннан « BCRE Россия» компаниясе генераль директоры Иосиф Левин, «FGN Capital» директорлар советы рәисе Александр Халдей кул куйды.

Казан – Яшел Үзән юнәлешендә 75 гектарлы мәйданда занманча сәүдә-ярминкә комплексы төзү күздә тотыла. Ул барлык халыкара стандартларга җавап бирәчәк һәм сәүдә рәтләрен, склад биналарын, ярминкәләр, күргәзмәләр, спорт ярышлары, эшлекле чаралар оештыру мәйданчыкларын, шулай ук ресторан, кафелар һәм башкаларны үз эченә алачак.

“Яңа Тура” технополисы эшчәнлеге нәтиҗәсендә Казанда күпләп-ваклап сату объектларын тәртипкә китерү мөмкинлеге туачак, бу исә, үз чиратында, шәһәрдә транспорт ташкынын киметергә, санитар-эпидемиологик вәзгыятьне яхшыртырга, территорияләрне генераль план нигезендә шәһәрнең төзекләндерү объектлары өчен бушатырга мөмкинлек бирәчәк.