Рөстәм Миңнеханов: "Татарстан уңышларында республика Прокуратурасының хезмәте зур"

Татарстанның барлык хокук саклау органнары, аерым алганда, республика Прокуратурасының җайга салынган эше ТРның тотрыклы үсешенә йогынты ясый. Бу хакта бүген Татарстан Президенты Рөстәм Миңнеханов ТР Прокуратурасы коллегиясендә белдерде.

Коллегия утырышында шулай ук республика Дәүләт Советы Рәисе урынбасары Александр Гусев, Татарстан Республикасы буенча баш федераль инспектор Рөстәм Идрисов, республика министрлыклары һәм ведомстволары җитәкчеләре катнашты.

Татарстан прокуроры Кафил Әмиров ТР Прокуратурасы органнарындагы яңа кадрлар, ТР Прокуратурасының 2011 ел эш нәтиҗәләре турында белдерде. Аерым алганда, Прокуратурага татарстанлылардан 69 мең мөрәҗәгать кабул ителгән. Һәр бишенче шикаять канәгатьләндерелгән, 10 меңнән артык гражданның мәнфәгатьләре якланган.

К.Әмиров ассызыклаганча, ТР Прокуратурасы социаль якланмаган халык катламына, шулай ук кече һәм урта эшмәкәрлек мәнфәгатьләрен яклауга зур игътибар биргән.

Татарстан Президенты Рөстәм Миңнеханов үз чыгышында республиканың иҗтимагый-сәяси һәм социаль-икътисади тормышының күп кенә мәсьәләләре буенча прокуратураның актив позициясен билгеләп үтте. ТР башлыгы Татарстан Прокуратурасы аеруча игътибар бирергә тиешле мәсьәләләрне билгеләде.

Шулай итеп, Р.Миңнеханов хезмәт законына кагылышлы мәсьәләләрне катгый контрольдә тотарга чакырды. Татарстан Президенты билгеләп үткәнчә, нәкъ менә прокуратура предприятиеләрне даими хезмәт хакы түләп барырга мәҗбүр итә. Эш урыннары куркынычсызлыгы мәсьәләләре актуаль булып кала һәм республика башлыгы Прокуратурага аларны аерым контрольгә алуны сорады.

Татарстан Президенты фикеренчә, коррупциягә каршы көрәштә түрәләрнең гамәлләрен төгәл билгеләү зарур, бу эштә Прокуратураның роле зур.

Рөстәм Миңнеханов ТР Прокуратурасын экстремизм күренешләргә катгый торырга чакырды. “Экстремизмга каршы мәсьәлә югары дәрәҗәдә булырга тиеш”, - дип ассызыклады республика башлыгы.

Татарстан Президенты ТР Прокуратурасына Казанның тарихи үзәген саклауда республика җитәкчелеге белән бергә эшләүләре өчен аерым рәхмәт белдерде. Рөстәм Миңнеханов сүзләренә караганда, республиканың башка торак пунктлары шәһәр төзелеше мәсьәләләре дә прокуратура контроленә мохтаҗ. “Тарихи үзәк – ул безнең җайга салынган эш үрнәге. Шәһәр төзелеше сәясәте мәсьәләләре буенча сезнең ярдәм итүне сорыйм”, - дип мөрәҗәгать итте Татарстан башлыгы ТР Прокуратурасына.

Рөстәм Миңнеханов сүзен йомгаклап, Татарстан Прокуратурасына республикада закон үтәлешен һәм хокук тәртибен саклауда зур өлеш керткәннәре өчен рәхмәт белдерде. “Бизнес өчен иң мөһиме – закон, хокук тәртибе һәм куркынычсызлык. Шуңа күрә республиканың икътисади уңышларында сезнең хезмәтегез зур”, - дип мөрәҗәгать итте республика башлыгы ТР Прокуратурасы хезмәткәрләренә.