Рөстәм Миңнеханов: “Иң мөһиме: мәгълүматны вакытында һәм һөнәри осталык белән бирү кирәк”

“Элек басма матбугаттан гына файдалансак, хәзер интернет мөмкинлекләре артты. Элегрәк халыкка төп мәгълүматны профессиональ журналистлар бирә иде. Интернет мөмкинлекләре үскәч, мәгълүматны кемнәр генә бирми. Тик бу иртәме-соңмы туйдырачак, интернет шаукымы уза торган әйбер. Басма матбугат та, телевидение дә, интернет та үз урынында булачак”. Матбугат һәм массакүләм коммуникацияләр буенча республика агентлыгының ел йомгакларына багышланган киңәйтелгән коллегия утырышында ТР Президенты Рөстәм Миңнеханов әнә шундый ышаныч белдерде.

Республика башлыгы фикеренчә, иң мөһиме: мәгълүматны дөрес итеп бирә белү. “Теге яки бу як позициясен дөрес, объектив итеп бирүче профессионалларга ихтыяҗ һәрвакыт зур”, -дип ассызыклады ул.

Президент бүген ММЧ ның хакимият белән халыкны бәйләүче күпер булуын, аның аша хакимиятнең, халыкның бер-берләренә үз тавышын ишеттерә алуына басым ясады. Шул шартларда мәгълүмат чараларының гражданлык җаваплылыгының үзәктә торуын да искәртте. “Сездән башка хакимият бернәрсә дә эшли алмый”, -дип мөрәҗәгать итте Президент залда утырган каләм ияләренә.

Президент, ММЧ алдындагы бурычларның артуына игътибар юнәлтте. Иң мөһиме, ди ул, мәгълүматны вакытында һәм һөнәри осталык белән бирү кирәк.

Президент каләм ияләренә иҗат итү өчен уңай шартлар тудыру зарурлыгына да тукталды. Коллегия утырышы алдыннан ул “Идел-пресс” полиграфия-нәшрият комплексындагы яңарту эшләренең барышы белән танышкан иде. Республика башлыгы биредә эшләрнең алга таба дәвам итәчәген, ремонт күпкатлы бина белән генә чикләнмәячәген, производство базасының да яңартылачагын җиткерде.

Бүгенге коллегия утырышында катнашкан ТР Дәүләт Советы рәисе урынбасары, журналистлар берлеге рәисе Римма Ратникова журналистларның профессиональлеген аерым билгеләп үтү чаралары кирәклегенә тукталган иде. Президент моның белән тулысынча килеште. Без журналистлар сезнең эшчәнлегенең бик мөһим булуын аңлыйбыз, дип ул белем күтәрү программалары мөмкинлегеннән тулы файдаланырга кирәклеген дә искәртеп узды. Аларның һөнәри осталык дәрәҗәсен күтәрү өчен, федераль, халыкара ММЧ белән булган элемтәләрне дә файдаланырга чакырды.
Президент аларга эшләрендә уңышлар теләп, алга таба да конструктив диалогта эшләрбез, дигән ышанычта калды.

Соңыннан Татарстан башлыгы бертөркем алдынгыларга ТР дәүләт бүләкләрен тапшырды. Бүләкләнүчеләр арасында “Татарстанның атказанган мәдәният хезмәткәре” исеменә лаек булган “Казан” телерадиокомпаниясе генераль директоры Мәдинә Тимерҗанова, ТР Президентының Рәхмәт хатын алган ИТАР-ТАСС хәбәрчесе Николай Сорокин да бар.